नेपाली प्राध्यापकका नाममा अक्स्फोर्ड विश्वविद्यालयले स्थापना गर्यो दुई पुरस्कार
<p>लन्डन। अक्स्फोर्ड विश्वविद्यालयले आफ्नो कानून संकायका उत्कृष्ट विद्यार्थीलाई प्रदान गर्ने गरी प्राध्यापक सूर्यप्रसाद सुवेदीको नाममा दुई वटा पुरस्कार स्थापना गरेको छ। </p>
<p>त्यसमध्ये एक ‘मानवअधिकार कानूनमा डा. सूर्य सुवेदी पुरस्कार’ हो। यो पुरस्कार हरेक वर्ष मानवअधिकारसम्बन्धी कानून विषयमा उत्कृष्ट नम्बर ल्याउने विद्यार्थीलाई प्रदान गरिनेछ।</p>
<p>अर्को पुरस्कार अक्स्फोर्ड विश्वविद्यालयमा हरेक वर्ष पीएचडीको उत्कृष्ट थेसिस लेख्ने विद्यार्थीलाई प्रदान गरिनेछ।</p>
<p>यो पुरस्कारको नाम ‘डा. सूर्य सुवेदी प्राइज फर द डीफील इन ल’ राखिएको छ । डीफील अक्स्फोर्ड विश्वविद्यालयको पीएचडीसरहको कार्यक्रम हो।</p>
<p>आफ्नो अध्ययनको विषयमा मौलिक योगदान दिने, संरचना, शैली र प्रस्तुतिमा पनि उत्कृष्ट थेसिसलाई डीफील पुरस्कार प्रदान गरिनेछ। </p>
<p>प्राध्यापक सुवेदी अक्स्फोर्ड विश्वविद्यालयका पूर्वविद्यार्थी हुन्। उनले सन् १९९३ मा अक्स्फोर्डबाटै डीफिल गरेका थिए।</p>
<p>अक्स्फोर्ड विश्वविद्यालयले अघिल्लो वर्ष प्राध्यापक सुवेदीलाई अन्तर्राष्ट्रिय कानून र मानवअधिकारको विकासमा महत्वपूर्ण योगदान दिएबापत महाविद्यावारिधिबाट सम्मान गरेको थियो। अक्स्फोर्ड विश्वविद्यालयले यस्तो उच्च सम्मान अपवादमा मात्रै प्रदान गर्छ।</p>
<p>सुवेदी अहिले बेलायतको लिड्स विश्वविद्यालयमा अन्तर्राष्ट्रिय कानूनका प्राध्यापक छन्। </p>
प्रतिक्रिया दिनुहोस्
.jpg)
