चन्द समूहद्वारा अपहरित बालिकाको सकुशल उद्दार, १३ कार्यकर्ता हतियारसहित पक्राउ
<p>काठमाडौं। सरकारले प्रतिबन्ध लगाएको नेत्रविक्रम चन्द समूहका कार्यकर्ताले अपहरण गरेकी धनुषाकी १४ वर्षीया बालिकाको प्रहरीले २४ घण्टापछि सकुशल उद्धार गरेको छ।</p>
<p>धनुषाको गणेशनाथ चारथान नगरपालिका–५ गौरीखेलबा अपहरणमा परेकी १४ वर्षीया बालिका गरिमा मोक्तानको उदयपुरको कटारी नगरपालिका–१ खसीबासबाट उद्धार गरिएको प्रदेश नम्बर २ का प्रहरी प्रमुख डीआईजी प्रद्य‍ुम्‍न कार्कीले जानकारी दिए। </p>
<p>“बालिकाको हिजो दिउँसो ३ बजे अपहरण भएको थियो”, उनले <em>देखापढी</em>सँग भने,“ आज दिउँसो ३ बजे सर्च अपरेशन चलाएर हामीले उद्धार गर्न सफल भएका हौं।”</p>
<p>डीआईजी कार्कीका अनुसार बालिकाको अपहरणमा संलग्न चन्द समूहका १३ जना कार्यकर्ता पक्राउ परेका छन्। उनीहरूमध्ये ८ जना पुरुष र ५ जना महिला रहेका छन्।</p>
<p>चन्द समूहले ती बालिकालाई लडाकु बनाउने उद्देश्यले अपहरण गरेर लगेको प्रहरीको प्रारम्भिक अनुसन्धानबाट खुलेको छ।</p>
<p>प्रहरीले चन्द समूहका कार्यकर्ताहरूबाट ३ वटा पेस्तोल, ११ वटा सकेट बम र प्रेसर कुकर बम पनि बरामद गरेको छ। डीआईजी कार्कीले अपहरणमा अन्य व्यक्ति पनि संलग्न भएको हुन सक्ने भन्दै ‘सर्च अप्रेसन’ जारी रहेको जानकारी दिए।<br />
</p>
प्रतिक्रिया दिनुहोस्
.jpg)
