गणित र कम्प्युटर विषयको विवादबारे अध्ययन गर्न समिति गठन
<p>काठमाडौं । कक्षा ११ र १२ को परिमार्जित पाठ्यक्रममा गणित र कम्प्युटर विषयलाई ऐच्छिक बनाइएकोबारे अध्ययन गर्न समिति गठन गरिएको छ।</p>
<p>इन्जिनियरिङ अध्ययन संस्थानको पुल्चोक क्याम्पसका प्राध्यापक डा. सुवर्ण शाक्यको संयोजकत्वमा ५ सदस्यीय समिति गठन गरिएको हो।</p>
<p>समितिले सात दिनभित्र सुझावसहितको प्रतिवेदन पेश गर्ने कार्यदेश तोकिएको पाठ्यक्रम विकास केन्द्रका सूचना अधिकारी गणेशप्रसाद भट्टराईले <em>देखापढी</em>लाई बताए। </p>
<p>आउँदो शैक्षिक सत्रदेखि लागु गर्न लागिएको कक्षा ११ र १२ को परिमार्जित पाठ्यक्रममा गणित र कम्प्युटर विषयलाई अनिवार्य नबनाई ऐच्छिक विषयमा राखिएको भन्दै विज्ञहरूले विरोध जनाएका थिए।</p>
<p>त्यसपछि शिक्षा, विज्ञान तथा प्रविधिमन्त्री गिरिराजमणी पोखरेलले समिति गठन गरेर थप अध्ययन गर्न निर्देशन दिएका थिए।</p>
<p>सोही निर्देशन बमोजिम समिति गठन गरिएको सूचना अधिकारी भट्टराईले बताए।</p>
<p>समितिमा सानोठिमी क्याम्पसका रमाकान्त पाण्डे, पाठ्यक्रम विकास केन्द्रका गणित तथा विज्ञान शाखाका निर्देशक प्रमिला वखती र प्रकाश खतिवडा सदस्य छन्।</p>
<p>सदस्य सचिवमा भने केन्द्रका अधिकृत खिलानाथ धमलालाई तोकिएको छ।</p>
<p>समितिले राष्ट्रिय पाठ्यक्रम प्रारुप २०७६ मा भएका विषयत संरचनामा छलफल गर्न तथा साधारणतर्फ कक्षा ११ र १२ मा भौतिक विज्ञान, जीव विज्ञान र रसायन विज्ञान विषयका अतिरिक्त कम्प्युटर विज्ञान तथा गणित विषयबारे अध्ययन गर्नेछ।</p>
<p>त्यसका लागि गणित तथा कम्प्युटर विज्ञान विषयसँग सम्वन्धित विश्वविद्यालय र उच्च शिक्षासम्वद्ध सरोकारवालासँग अन्तरक्रिया र छलफल गरेर सुझाव दिन भनिएको छ।</p>
<p>कक्षा ११ र १२ मा गणित विषयलाई ऐच्छिक बनाउन नहुने भन्दै गणित विषयका विज्ञहरूले लामो समयदेखि विरोध जनाउँदै आएका छन्।</p>
प्रतिक्रिया दिनुहोस्
.jpg)
