साविक विजेता लिभरपुल स्तब्ध, खाली रंगशालामा पिएसजीको पुनरागमन
<p>काठमाडौं। गोलकिपर एड्रिनको गल्तीमा साविक विजेता लिभरपुलले गएराति अन्तिम-१६ को दोस्रो लेगमा एट्लेटिको मड्रिडलाई ३-२ तथा समग्रमा ४-२ को नतिजा सुम्पिएपछि च्याम्पियन्स लिग यात्रामा पूर्णविराम लागेको छ।</p>
<p>योर्गान क्लोपको लिभरपुलले पहिलो गोलमा १-० ले पछि परेको स्थिति घरेलु मैदान एनफिल्डमा उल्टाउने आशा गरिएको थियो।</p>
<p>जर्जिनो विजनाल्डमले पहिलो हाफ सकिन दुई मिनेट बाँकी छँदा हेडमार्फत गोलबाट लिभरपुलले पुनरागमनको संकेत गरेको थियो।</p>
<p>दोस्रो हाफको अन्तिम मिनेटमा एन्ड्रयू रोबर्टसनको हेड क्रसबारमा लागेर फर्किएपछि लिभरपुलको जित टरेको थियो।</p>
<p>थपिएको समयमा रोबाटो फिर्मिनोले शुरूमै गोल गरेपछि लिभरपुलले अग्रता लिएको थियो।</p>
<p>तर, एट्लेटिकोका बैकल्पिक खेलाडी मार्कोस लोरेन्टेले ९७ र १०५ मिनेटमा गोल गरेपछि लिभरपुलको सम्भावना सकिएको थियो।</p>
<p>१२०औं मिनेटमा अल्भारो मोराटाले अर्को गोल थपेपछि एट्लेटिकोले लिभरपुललाई घरेलु मैदानमा स्तब्ध बनायो।</p>
<p>युरोपियन प्रतियोगितामा लिभरपुलले क्लोपको प्रशिक्षणमा एनफिल्डमा हारेको यो पहिलो हो।</p>
<p>घरेलु मैदानमा यसअघि लिभरपुल अक्टुबोर २०१४ मा पराजित भएको थियो।</p>
<p>एट्लेटिकोले च्याम्पियन्स लिगको नकआउट चरणमा पहिलो लेग जित्दा पछिल्ला छ मध्ये पाँच खेल जित जितेको छ।</p>
<p>गत सिजन भने पहिलो लेग २-० ले जितेर पनि युभेन्टससँग दोस्रो लेगमा ३-० ले पराजित भएको थियो।</p>
<p>लिभरपुलले च्याम्पियन्स लिगको नकआउट चरणमा दुबै लेग हारेको २००५/०६ पछि यो पहिलो हो।</p>
<p>२००५/०६ मा लिभरपुल बेनफिकासँग पराजित भएको थियो।</p>
<p>गएराति नै सम्पन्न अर्को खेलमा पेसिस सेन्ट जर्मन (पिएसजी) ले भने उत्कृष्ट पुनरागमन गर्‍यो।</p>
<p><img alt="" height="671" src="https://www.dekhapadhi.com/storage/photos/shares/Sports/nemar.jpg" width="960" /></p>
<p>पिएसजीले पहिलो लेगमा २-१ ले पछि परेको स्थिति उल्टाउँदै बोरुसिया डर्टमण्डलाई २-० तथा समग्रमा ३-२ ले पराजित गर्‍यो।</p>
<p>कोरोना भाइरस संक्रमणको जोखिमका कारण खाली रंगशालामा खेलिएको खेलमा पिएसजीको जितमा नेइमारले २८औं मिनेटमा गोल गरे।</p>
<p>युआन बर्नाटले ४५औं मिनेटमा गरेको गोल पिएसजीका लागि निर्णायक बन्यो।</p>
<p>८९औं मिनेटमा इम्रे क्यानले रातो कार्ड खाएपछि डर्टमण्ड दश खेलाडीमा सिमित भएको थियो।</p>
<p>पहिलो लेगमा जर्मन बुन्डेसलिगाको क्लब डर्टमण्डले २-१ को नतिजा निकालेको थियो।</p>
<p>रंगशाला खाली गरिए पनि ठूलो संख्यामा पिएसजीका समर्थक रंगशालाबाहिर भेला भएका थिए।</p>
प्रतिक्रिया दिनुहोस्
.jpg)
