मेसीको गोलमा बार्सिलोनाको जित, शीर्ष स्थानमा उक्लियो
<p>काठमाडौं। लियोनल मेसीले अन्तिम समयमा गरेको पेनाल्टी गोलमा बार्सिलोनाले गएराति रियाल सोसिडाडलाई १-० ले पराजित गरेको छ।</p>
<p>जितसँगै बार्सिलोना स्पेनिस ला लिगाको शीर्ष स्थानमा उक्लिएको छ।</p>
<p>बार्सिलोनाले दोस्रो स्थानको रियाल मड्रिडलाई दुई अंकले पछि पार्दै शीर्ष स्थानमा उक्लिएको हो। तर, रियालले एक खेल कम खेलेको थियो।</p>
<p>जिनेदिन जिदानको रियालले आज रियाल बेटिसको भ्रमण गर्नेछ। रियाल बेटिसलाई हराए रियाल मड्रिड पुनः शीर्ष स्थानमा उक्लनेछ।</p>
<p>रियाल सोसिडाडका रोबिनले नोमान्डले पेनाल्टी क्षेत्रमा हातले बल क्लियर गरेपछि बार्सिलोनाले पेनाल्टी अवसर पाएको थियो।</p>
<p>रेफ्री जुवान मार्टिनेजले भिडियो सहायक रेफ्री (भिएआर) को सहयोगमा पेनाल्टीको निर्णय लिएका थिए।</p>
<p>जसलाई बार्सिलोनाका कप्तान मेसीले कुनै गल्ती नगरी गोल गरे। जारी लिगमा मेसीको यो १९औं गोल हो।</p>
<p>रियाल सोसिडाडका एलेक्जेन्डर इसाकले हानेको प्रहार थोरैले बाहिरिएको थियो। भ्रमणकारी टीमले गोलका लागि गरेको सबभन्दा राम्रो प्रयास त्यही थियो।</p>
<p>बार्सिलोनाका जोर्डीले अल्बाले इन्जुरी समयमा बैकल्पिक खेलाडी अंसुमन फातीको पासमा गोल गरेका थिए।</p>
<p>तर, भिडियो सहायक रेफ्रीलाई त्यसलाई अफसाइड घोषित गरिदियो।</p>
<p>बार्सिलोनाले जनवरीमा अनुबन्ध गरेका मार्टिन ब्रेथह्वाइटले पहिलो हाफमा केही राम्रा अवसर पाएर पनि सदुपयोग गर्न सकेनन्।</p>
<p>त्यसअघि एट्लेटिको मड्रिडले घरेलु मैदानमा सेभियासँग २-२ को बराबरी खेल्यो।</p>
<p>लुक डी जोङको गोलमा भ्रमणकारी सेभियाले १९औं मिनेटमा अग्रता लिएको थियो।</p>
<p>अल्भारो मोराटाले ३२औं मिनेटमा बराबरी गोल फर्काए। त्यसको चार मिनेट वित्न नपाउँदै जाओ फेलिक्सको गोलमा एट्लेटिकोले अग्रता लियो।</p>
<p>तर, पहिलो हाफ सकिन दुई मिनेट बाँकी छँदा सेभियाले पेनाल्टी अवसर पायो। जसलाई लुकास ओकाम्पोसले गोल गर्दै सेभियालाई एक अंक दिलाए।</p>
<p>बराबरीसँगै एट्लेटिकोले लिगको तेस्रो स्थानमा उक्लने मौका गुमायो।</p>
<p>एट्लेटिको ४५ अंकका साथ पाँचौं स्थानमा छ भने सेभिया ४७ अंकका साथ तेस्रो स्थानमा छ। ४६ अंकका साथ गेटाफे चौथो स्थानमा छ।</p>
प्रतिक्रिया दिनुहोस्
.jpg)
