जब पारस कुचो समातेर पशुपति सरसफाइमा निक्ले
<p>काठमाडौं। सरसफाइ अभियानकर्मी केपी खनाल एउटा प्रस्ताव लिएर पूर्वयुवराज पारस शाह कहाँ पुगे। प्रस्ताव थियो, सरसफाइ अभियानमा सहभागिता जनाइदिनेबारे।</p>
<p>आफ्नो प्रस्ताव पारसले अस्वीकार गर्ने त होइनन् भन्ने खनालमा चिन्ता थियो। तर, जब उनले पारसलाई भेटेर प्रस्ताव राखे उनी प्रफुल्लित भएर फर्किए।</p>
<p>खनालको प्रस्तावमा पारसले भने, ‘युवाहरूले गर्ने काममा मेरो सधैँ सहयोग हुन्छ, म आउँछु।’</p>
<p>आज शनिबार बिहान ७ बजे पशुपति मन्दिर क्षेत्रमा सरसफाइ कार्यक्रम गरियो। रातिदेखि नै परेको पानीका कारण कतै कार्यक्रम नै रद्द गर्नुपर्ने अवस्था त आउने हो कि भन्ने अभियानकर्मी खनालको मनमा लागिरहेथ्यो। तर, पारसले नै पानी रोकिएपछि सरसफाइ गरौंला, स्थगित नगरौं भनेको खनाल बताउँछन्।</p>
<p>बिहान ९ बजेतिर पानी रोकियो। र, सरसफाइ अभियान शुरू भयो। पारसले कुचो समातेर एकछिन बढारे। </p>
<p>सिमसिम पानी परिरहेका बेला पारस गाडी चढेर पशुपतिनाथ पुगेका थिए। मन्दिर परिसर सरसफाइमा सरिक भएका पारसले अभियानको सफलताको शुभकामना व्यक्त गरे।</p>
<p>शुरूमा खनालले पारसलाई माला लगाएर स्वागत गरेका थिए। कार्यक्रमको शुरुआतअघि खनालले मन्तव्य राखेपछि पारसलाई पनि बोल्न भनियो। तर, उनी बोलेनन्।</p>
<p>लगत्तै पारसले सरसफाइ अभियानको शुरुआत गरे। “यो अभियान दुई वर्षदेखि जारी छ। पूर्वयुवराज आएर अभियानलाई थप उचाइ प्रदान गर्नुभयो”, सरसफाइ अभियानकर्मी खनालले देखापढीसँग भने।</p>
प्रतिक्रिया दिनुहोस्
.jpg)
