सुँगुरको मासु खाँदा पाँचथरमा २ कैदीको मृत्यु, २ जना सिकिस्त
<p>पाँचथर। सुँगुरको मासु खाँदा जिल्ला कारागार पाँचथरका २ जना कैदीको मृत्यु भएको छ। अन्य २ जना सिकिस्त बिरामी छन्।</p>
<p>१९ असोज राति सुँगुरको मासु खाएपछि बिरामी परेका फालेलुङ गाउँपालिका–८, याङनामका २५ वर्षीय वुद्धि केरुङ र फिदिम नगरपालिका–१०, याङनामका अन्दाजी ३३ वर्षीय जयप्रकाश जवेगुको मृत्यु भएको पाँचथरका प्रहरी नायब उपरीक्षक सिद्धराज न्यौपानेले बताए।</p>
<p>केरुङको पाँचथर अस्पतालमा उपचारको क्रममा मृत्यु भएको हो। जवेगुलाई झापा लैजादै गर्दा २० गते राती बाटोमा मृत्यु भएको प्रहरीले बताएको छ।</p>
<p>कुम्मायक गाउँपालिकाका दिनेश खजुम र सुन्दर राई बिरामी छन् । उनीहरुको बीएण्डसी अस्पताल विर्तामोडमा उपचार भइरहेको छ।</p>
<p>दशैँको अवसरमा कैदीहरुले १९ असोजमा कारागारभित्रै सुँगुर ल्याएर काटेका थिए। शुरुमा झाडापखाला लागेपछि उनीहरुलाई अस्पतालमा लगिएको थियो। रासस</p>
<p> </p>
प्रतिक्रिया दिनुहोस्
.jpg)
