पिकअपले मोटरसाइकललाई ठक्कर दिँदा एकजनाको मृत्यु
<p>जलेश्वर। बिपी राजमार्गअन्तर्गत महोत्तरी जिल्लाको बर्दिवास नगरपालिका-३ स्थित कालापानीमा पिकअपको ठक्करबाट मोटरसाइकलमा सवार एकजनाको मृत्यु भएको छ।</p>
<p>मृत्यु हुनेमा सिन्धुली जिल्लाको कमलामाई नगरपालिका-७ बस्ने ४६ वर्षीय दीप खत्री रहेको जिल्ला प्रहरी कार्यालय महोत्तरीका प्रहरी नायब उपरीक्षक माधवप्रसाद बुढाथोकीले बताए।</p>
<p>गएराति बा. ४४ प ६२२४ नम्बरको मोटरसाइकललाई विपरीत दिशाबाट आउँदै गरेको स. १ च १८०६ नम्बरको टाटा पिकअपले ठक्कर दिँदा खत्री गम्भीर घाइते भएका थिए।</p>
<p>बर्दिवासस्थित जनसेवा अस्पतालमा प्राथमिक उपचारपश्चात थप उपचारका लागि काठमाडौँ लैजाँदै गर्दा बाटोमा उनको मृत्यु भएको प्रहरीले जनाएको छ।</p>
<p>सोही दुर्घटनामा रामेछाप मन्थली नगरपालिका-५ का ३८ वर्षीय रुद्रराज कार्की घाइते भएका छन्।</p>
<p>उनको बर्दिवासमा उपचार भइरहेको छ। <em>रासस</em></p>
प्रतिक्रिया दिनुहोस्
.jpg)
