राष्ट्रिय सभाका १८ सदस्यले लिए शपथ
<p>काठमाण्डौं। नवनिर्वाचित राष्ट्रिय सभाका १८ सदस्यले शपथ लिएका छन्। </p>
<p>राष्ट्रिय सभाका अध्यक्ष गणेशप्रसाद तिमिल्सिनाले शपथ गराएसँगै उनीहरूले आजदेखि राष्ट्रिय सभा सदस्यको औपचारिक जिम्मेवारी पाएका छन्।</p>
<p>राष्ट्रिय सभा सदस्य निर्वाचन ऐन, २०७४ को दफा ६८ को उपदफा (१) को व्यवस्था अनुसार अध्यक्ष तिमिल्सिनाले संविधानको धारा ८६ को उपधारा (२) बमोजिम नवनिर्वाचित सदस्यलाई शपथ गराएका हुन्।</p>
<p>संघीय संसद भवन (अन्तर्राष्ट्रिय सम्मेलन केन्द्र) को ल्होत्से हलमा ती १८ जना सदस्यको शपथ समारोह कार्यक्रम तय भएको थियो।</p>
<p>शपथ लिनेहरूमा इन्दिरादेवी गौतम, गोपीबहादुर सार्की अछामी, देवेन्द्र दाहाल, तुलसाकुमारी दाहाल, राधेश्याम पासवान, शेखरकुमार सिंह, मृगेन्द्रकुमार सिंह यादव, गङ्गाकुमारी बेल्बासे र वेदुराम भुसाल छन्।</p>
<p>नवनिर्वाचित सदस्य भगवती न्यौपाने, नारायणकाजी श्रेष्ठ, विमला घिमिरे, जगप्रसाद शर्मा, गोपाल भट्टराई, सुमित्रा बिसी, मायाप्रसाद शर्मा, शारदादेवी भट्ट र तारामान स्वाँरले पनि आजै शपथ लिएका छन्।</p>
<p>समारोहमा अध्यक्ष तिमिल्सिनाले नयाँ सदस्यलाई सांसदको लोगो लगाइदिनुका साथै बधाई दिए ।</p>
<p>राष्‍ट्रिय सभा सदस्यमध्ये एक तिहाइको कार्यकाल दुई वर्षमा सकिने संवैधानिक प्रावधान अनुसार खाली हुने ठाउँमा ९ माघमा निर्वाचन भएको थियो।</p>
<p>निर्वाचनबाट नेकपाका १६ र राष्ट्रिय जनता पार्टीका दुई जना उम्मेद्‌वार विजयी भएका थिए।</p>
<p>राष्‍ट्रपतिबाट मनोनित हुने एक सदस्यको लागि भने मन्त्रिपरिषद्‍ले सिफारिस गर्न बाँकी छ।</p>
प्रतिक्रिया दिनुहोस्
.jpg)
