इपीएलमा अर्को ठूलो नाम 'कोरी एन्डरसन'
<p>काठमाडौं। एभरेष्ट प्रिमियर लिग (इपीएल) को २०२० सिजनका लागि काठमाडौं किंग्स-११ ले न्युजल्यान्डका आक्रमक ब्याट्सम्यान कोरी एन्डरसनलाई ल्याउने भएको छ।</p>
<p>काठमाडौं किंग्सले आज न्युजल्यान्डका ब्याटिङ अलराउन्डर एन्डरसनलाई अनुबन्ध गरेको जनाएको छ।</p>
<p>‘‘एन्डरसन विश्व क्रिकेटकै आक्रमक ब्याट्सम्यानमध्येका एक हुन्। आइपीएलमा लामो अनुभव बटुलेका एन्डरसनको आगमनले हाम्रो टीम अझ बलियो बनेको छ,’’ काठमाडौं किंग्सका प्रमुख कार्यकारी अधिकृत राजजंग थापाले भने।</p>
<p>एन्डरसनले जनवरी २०१४ मा वेष्ट इन्डिजविरुद्ध एकदिवसीय अन्तर्राष्ट्रिय क्रिकेटमा सबभन्दा चाडो शतक बनाउने कीर्तिमान बनाएका थिए।</p>
<p>१३१ रनमा अविजित रहेका एन्डरसनले ३६ बलमा १४ छक्का र ६ चौका हान्दै शतक बनाएका थिए।</p>
<p>उनले १९९६ मा शाहिद अफ्रिदीले बनाएको कीर्तिमान तोडेका थिए। अफ्रिदीले ३७ बलमा शतक बनाएका थिए।</p>
<p>एन्डरसनको कीर्तिमानलाई जनवरी २०१५ मा दक्षिण अफ्रिकाका एबी डी भिलियर्सले तोडेका थिए।</p>
<p>डी भिलियर्सले वेष्ट इन्डिजविरुद्ध ३१ बलमा शतक बनाएका थिए।</p>
<p>एन्डरसनले १३ टेष्ट क्रिकेटमा ६८३ रन बनाएका छन् भने १६ विकेट लिएका छन्। उनले ४९ एकदिवसीय अन्तर्राष्ट्रिय क्रिकेटमा १ हरजा १०९ रन बनाएका छन्।</p>
<p>एकदिवसीय अन्तर्राष्ट्रिय क्रिकेटमा उनले ६० विकेट लिइसकेका छन्।</p>
<p>३१ ट्वान्टी-२० अन्तर्राष्ट्रिय क्रिकेटमा एन्डरसनले ४८५ रन तथा १४ विकेट लिएका छन्।</p>
<p>इपीएलमा यसअघि क्रिस गेल, ड्वानी स्मिथ, उपुल थरंगाजस्ता खेलाडी खेल्ने पक्का भइसकेको छ।</p>
प्रतिक्रिया दिनुहोस्
.jpg)
