ठगी मुद्दाका फरार प्रतिवादी पक्राउ
<p>काठमाडाैं। महानगरीय अपराध महाशाखा टेकुको टोलीले ठगी मुद्दामा अदालतबाट दोषी ठहर भई फरार रहेका एक युवकलाई पक्राउ गरेको छ।</p>
<p>बैतडी दशरथचन्द नगरपालिका-१ बस्‍ने ३२ वर्षीय रमेश बडूलाई आज नख्खुबाट पक्राउ गरेको हो।</p>
<p>उच्च अदालत पाटनले बडूलाई ठगी मुद्दामा १६ कात्तिक २०७५ मा दुई महीना चार दिन कैद र दुई लाख ५० हजार रूपैयाँ जरिवाना ठहर गरेको थियो। अदालतको फैसलासँगै उनी फरार थिए।</p>
<p>भीमबहादुर भण्डारीले ठगी गरेको आरोपमा बडूविरुद्ध मुद्दा दायर गरेका थिए।</p>
<p>नेपाली सेनाको अहरी दमन सिंहदरबार गणमा कार्यरत सिपाही भण्डारीलाई आफ्नो रक्षा मन्त्रालयसम्म राम्रो सम्बन्ध रहेको र शान्ति सेनामा पठाइदिने भन्दै दुई लाख ५० हजार रूपैयाँ बैंकमा जम्मा गर्न लगाएर ठगी गरेका थिए।</p>
<p>उजुरीकै आधारमा अपराध महाशाखाको टोलीले २१ वैशाख २०७३ पक्राउ गरेको थियो। बडूले राष्ट्रिय अनुसन्धानमा जागिर लगाई दिने भन्दै थप दुईजनाबाट समेत २४ लाख रूपैयाँ ठगी गरेको खुलेको छ।</p>
<p>रमेशलाई आवश्यक अनुसन्धान तथा कारबाहीका लागि जिल्ला अदालत काठमाडौंमा उपस्थित गराएर कारागार पठाइएको छ।</p>
प्रतिक्रिया दिनुहोस्
.jpg)
