चलेन ब्याटिङ, लगातार दोस्रो हारपछि नेपालको सम्भावना कमजोर
<p>काठमाडौं। कमजोर ब्याटिङले निरन्तरता पाउँदा नेपाल एसीसी ट्वान्टी-२० इस्टर्न रिजन क्रिकेट प्रतियोगितामा पराजित भएको छ।</p>
<p>एसिया कपको छनोट प्रतियोगताका रूपमा रहेको प्रतियोगितामा नेपालले हङकङलाई ४३ रनको नतिजा सुम्पिएको हो।</p>
<p>थाइल्याण्डको टेर्डथाई क्रिकेट मैदानमा हङकङले ६ विकेट गुमाएर १५४ रन बनाएको थियो।</p>
<p>१५५ रनको लक्ष्य पछ्याएको नेपालले १८.१ ओभरमा सबै विकेट गुमाएर १११ रन मात्र जोड्न सक्यो।</p>
<p>नेपाल पहिलो खेलमा पनि मलेसियासँग २२ रनले परािजत भएको थियो।</p>
<p>मलेसियाविरुद्ध पनि १५५ रनको लक्ष्य पाएको नेपालले १३२ रन बनाउन सक्यो।</p>
<p>१५५ रनको लक्ष्य पछ्याएको नेपालका लागि ओपनर कुशल मल्ल र ज्ञानेन्द्र मल्लले राम्रो शुरूआत दिएका थिए।</p>
<p>तर, हारून मोहम्मदले कुशललाई निजकत खानमार्फत क्याच गरेपछि नेपालले निरन्तर विकेट गुमायो।</p>
<p>कुशल र ज्ञानेन्द्रले पहिलो विकेटका लागि ४.४ ओभरमा ४२ रनको साझेदारी गरेका थिए।</p>
<p>कुशलले १९ तथा ज्ञानेन्द्र मल्लले ४६ रन जोड्नुबाहेक नेपालका अन्य कुनै पनि ब्याट्सम्यानले खुलेर प्रदर्शन गर्न सकेनन्।</p>
<p>पारस खड्का चार, दीपेन्द्रसिंह ऐरी पाँच, पवन सर्राफ एक, विनोद भण्डारी पाँच, आरिफ शेख १०, करण केसी सात, सन्दीप लामिछाने शुन्य र अभिनाष बोहराले १२ रनमा आउट भए।</p>
<p>हङकङका हारून मोहम्मदले पाँच, अफताब हुसैनले तीन तथा इसान खानले दुई विकेट लिए।</p>
<p>लगातार दोस्रो हारसँगै नेपालको सम्भावना कमजोर बनेको छ। नेपालले अब थाइल्यान्ड र सिंगापुरविरुद्ध मात्र खेल्न बाँकी छ।</p>
<p>इस्टर्न रिजनबाट शीर्ष दुई टीमले मलेसियामा हुने फाइनल छनोट प्रतियोगितामा स्थान बनाउँनेछ।</p>
<p>फाइनल छनोटबाट विजेता टीमले पाकिस्तानमा हुने एसिया कपमा स्थान बनाउँनेछ।</p>
<p>नेपाललाई प्रतियोगितामा सबभन्दा बलियो दाबेदारका रुपमा लिइएको थियो। तर, कमजोर ब्याटिङ उदांगो भएपछि नेपालको अघिल्लो चरण पुग्ने सम्भावना कमजोर बनेको छ।</p>
<p>नेपालका कप्तान ज्ञानेन्द्र मल्लले टस जितेर हङकङलाई ब्याटिङको निम्तो दिएका थिए। तर ज्ञानेन्द्र निर्णय सही सावित हुन सकेन।</p>
<p>हङकङका साहिद वासिफ र निजाकत खान मोहम्मदले पहिलो विकेटका लागि ५८ रनको साझेदारी गरे।</p>
<p>वाँया हाते स्पिनर सुशन भारीले वासिफलाई आरिफ शेखमार्फत क्याच गर्दै दुईको साझेदारी तोडेका थिए।</p>
<p>निजाकतले खानले हारून माहेम्मद अर्शदसँग दोस्रो विकेटका लागि २१ रनको साझेदारी गरे। हङकङको दोस्रो साझेदारीलाई पनि सुशन भारीले तोडे।</p>
<p>निजाकत खानलाई सुशनले कुशल मल्ल मार्फत क्याच गरे। लगत्तै किनचित शाहलाई सन्दीप लामिछानेले दीपेन्द्रसिंह ऐरीमार्फत क्याच गरे।</p>
<p>त्यसपछि हारून मोहम्म्द र मोहम्मद अजिज खानले चौथो विकेटका लागि २५ रनको साझेदारी गरे। कुशलले हारून मोहम्मदलाई अभिनाष बोहरामार्फत क्याच गरे।</p>
<p>साहिद वासिफले २६ रन बनाउँदा निजकत खानले ४८ रन जोडे। हारून मोहम्मदले २७ रन बनाए भने मोहम्मद अजिजले २९ रन बनाए। जेम्स जोन एटकिन्सनले १३ रन बनाए।</p>
<p>नेपालका सन्दीप लामिछाने र सुशन भारीले समान दुई विकेट लिए भने कुशल मल्लको नामा एक विकेट रह्यो।</p>
प्रतिक्रिया दिनुहोस्
.jpg)
