खप्तड गाेल्डकपकाे सेमिफाइनल समीकरण पूरा
<p>कैलाली। धनगढीमा जारी नेपाल आइस सुदूरपश्चिम अन्तर्राष्ट्रिय आमन्त्रण सुदूरपश्चिम खप्तड गोल्डकपको सेमिफाइनल समीकरण पूरा भएको छ।</p>
<p>प्रतियोगितामा हिमालयन शेर्पा, सुदूरपश्चिम-११, एपीएफ क्लब र थ्री स्टार क्लब अन्तिम चारमा पुगेका छन्।</p>
<p>आज भएको चौथो क्‍वार्टरफाइनलमा जित हात पार्दै हिमालयन शेर्पा क्लब अन्तिम चारमा पुगेको हाे।</p>
<p>पहिलो चरणमा 'बाई' पाएर क्‍वार्टरफाइनल पुगेको हिमालयन शेर्पाले गोर्खा ब्वाइज रुपन्देहीलाई टाइब्रेकरमा ५-४ ले पराजित गरेको हो।</p>
<p>निर्धारित समयमा दुवै टीमले गोलरहित बराबरी खेलेपछि खेल टाइब्रेकरमा पुगेकाे थियाे।</p>
<p>टाइब्रेकरमा हिमालयन शेर्पाका गोलरक्षक टेकेन्द्र थापा नायक बने। उनले गोर्खा ब्वाइजका सुजित बुढाथोकीको प्रहार बचाए।</p>
<p>गोर्खा ब्वाइजका हरि कठायत, अनिष तामाङ, रुपबहादुर लामा र उत्तम गुरुङले गोल गरे। शेर्पाका उर्लिच सिवाई, आशिष गुरुङ, दिवस उराउ, भिसन गुरुङ र विकास राईले गोल गरे।</p>
<p>भाेलि, १७ फागुनमा प्रतियोगिताको पहिलो सेमिफाइनल खेलमा आयोजक सुदूरपश्चिम-११, स्पोर्टस् क्लब र विभागीय टीम नेपाल एपीएफ क्लबले प्रतिस्पर्धा गर्नेछन्।</p>
<p>त्यस्तै १८ फागुनमा दोस्रो सेमिफाइनलमा थ्रीस्टार क्लब र हिमालयन शेर्पा क्लब प्रतिस्पर्धा गर्नेछन्।</p>
<p>प्रतियाेगिता २० फागुनसम्म चल्नेछ।</p>
प्रतिक्रिया दिनुहोस्
.jpg)
