हेलिकप्टरबाट सामान झरेपछि स्थानीयवासी चिन्तित
<p>सोलुखुम्बु। उडिरहेको हेलिकप्टरबाट जस्तापाता खसेपछि स्थानीयवासी त्रसित बनेका छन् । </p>
<p>सोलुदूधकुण्ड नगरपालिका-१ को लुङ्दिङ जंगलमा कैलाश एयरको हेलिकप्टरबाट गत हप्ता करीब छ केजी जस्तापातासहित दुई रोल म्याट्रिक्स खसेपछि स्थानीयवासीमा त्रास र आक्रोश पैदा भएको हो।</p>
<p>टाक्सिन्दुका कुमार विश्कर्माले हेलिकप्टरबाट पटक-पटक सामग्री खस्ने गरेको भए पनि सम्बन्धित निकायले सुरक्षामा ध्यान नदिएको गुनासो गरे।</p>
<p>सोही गाउँका टेण्डी शेर्पाले सुरक्षित ढुवानीका लागि सम्बन्धित पक्षलाई बारम्बार आग्रह गरेको स्मरण गर्दै आफूहरुको सुझाव कार्यान्वयन नभएको बताए।</p>
<p>सोलुदूधकुण्ड नगरपालिका-१ टाक्सिन्दुडाँडाबाट खुम्बु क्षेत्रका लागि निर्माणलगायत दैनिक उपभोग्य वस्तु ढुवानी भइरहेको छ।</p>
<p>निर्माण सामग्रीसहित काठसमेत हेलिकप्‍टरमा झुण्ड्याएर ढुवानी हुँदा सुरक्षा जोखिम बढ्ने स्थानीयवासी बताउँछन्।</p>
<p>नेपाल नागरिक उड्डयन ऐन २०७३ मा विमानस्थलका अधिकारप्राप्त कर्मचारी वा सुरक्षाकर्मीबाट खनतलासी नगराई कुनै पनि यात्रु, मालसामान विमानस्थल निषेधित क्षेत्रमा प्रवेश गराउनु वा वायुयानबाट ओसारप्रसार गर्नु/गराउनु नहुने उल्लेख छ।</p>
<p>सोलुदूधकुण्ड नगरपालिकाका प्रमुख नाम्गेल जाङ्बु शेर्पाले उडान तथा अवतरणको विषय आफूहरुको क्षेत्राधिकारभित्र नभएको बताउँछन्।</p>
<p>खुम्बु पासाङल्हामु गाउँपालिकाका प्रवक्ता लाक्पाछिरी शेर्पाले गाउँपालिकामा सडकको पहुँच नपुगेकाले हेलिकप्टरबाट सामान ढुवानीको विकल्प नभएको बताए।</p>
<p>सामान ढुवानी गर्ने सम्बन्धित कम्पनीले ध्यान दिनुपर्ने उनको भनाइ छ।</p>
<p>जस्तापाता खसेको विषयमा छानबिन गर्न चालक गुन्जमान लामाको नेतृत्वमा गठित तीन सदस्यीय टोलीले टाक्सिन्दु पुगेर अवलोकन गरेको नागरिक उड्डयन प्राधिकरण लुक्लाका प्रमुख इमनाथ अधिकारीले बताए।</p>
<p>सोलुखुम्बुका प्रहरी प्रमुख प्रहरी नायब उपरीक्षक टेकुनन्द इवा लिम्बूले भने, “सुरक्षा समितिको बैठकले पनि आवश्यक छलफलपछि निर्णय गर्छौँ, अहिलेलाई ढुवानी बन्द गरिएको छ।” <em>रासस</em></p>
प्रतिक्रिया दिनुहोस्
.jpg)
