पोखरामा १६ वर्षका बालक आफैँले बनाए गाडी
<p>पोखरा। पोखरा महानगरपालिका-२७ स्थित लिटलफ्लावर एजुकेशनल एकेडेमीमा कक्षा १० मा अध्ययनरत विद्यार्थी रुपेश चँदरा खड्काले आफैँले बनाएको विद्युत्बाट चल्ने गाडी (गो कार्ट) चलाएर सबैलाई दंग पारेका छन्।</p>
<p>उनको सिर्जना देखेर विद्यार्थी, शिक्षक तथा अभिभावक खुसी देखिए।</p>
<p>विद्यालयको २७ औँ अभिभावक दिवसका अवसरमा आयोजित कार्यक्रममा उनले आफैँले बनाएको विद्युत्बाट चल्ने गाडी चलाएर देखाएका हुन्। विद्यालयले उनीसँगै विज्ञान शिक्षक योगराज पौडेललाई पनि सम्मान गरेको छ।</p>
<p>रुपेशले बनाएको गाडी चलाउँदै प्रमुख अतिथि पोखरा महानगरपालिका-२७ का वडा अध्यक्ष पूर्णकुमार गुरुङले सिकेका विषयलाई व्यवहारमा उतारेको भन्दै प्रशंसा गरेका छन्।</p>
<p>विज्ञान र प्रविधिमा रुचि राख्ने १६ वर्षीय रुपेश सामान्य परिवारका विद्यार्थी हुन्।</p>
<p>उनीमा जिज्ञासु स्वभाव रहेको विद्यालयका प्रिन्सिपल विष्णुहरि पौडेलले बताए।</p>
<p>“उनी जिज्ञासु छन्, यसअघि पनि उनले डोजर, जेसिभी, हाइड्रोलिक ब्रिज, सानो गाडी बनाइसकेका छन्”, पौडेलले भने।</p>
<p>पर्वतको कुष्मा नगरपालिका-१ पाङ स्थायी बसोवास भई रुपेशको परिवार अहिले पोखराको रिठेपानीमा बस्दै आएको छ।</p>
<p>उनका बाबु सोमबहादुर चँदराको रिठेपानीमा ग्रिल उद्योग छ।</p>
<p>बुबाले ग्रिल उद्योग चलाएका कारण गाडी बनाउनका लागि सामग्री जुटाउन आफूलाई निकै सजिलो भएको रुपेशले बताए ।</p>
<p>झण्डै २० दिनमा तयार गरेको गाडीका लागि एक लाख २० हजार जति खर्च लागेको भन्दै रुपेशले विद्यालय र परिवारको साथ पाएको बताए। <em>रासस</em></p>
प्रतिक्रिया दिनुहोस्
.jpg)
