‘पारस’मा अनमोल इन निश्चल आउट
<p>काठमाडौं। अभिनेता अनमाेल केसी ‘ए मेरो हजुर ४’ को छायांकनमा व्यस्त छन्। यहीबीचमा उनको हातमा अर्को चलचित्र पनि परेको छ।</p>
<p>‘लुट’ चलचित्रका निर्माता माधव वाग्लेको निर्देशनमा बन्न लागेको चलचित्र ‘पारस’मा अनमोल अनुबन्ध भएका छन्। आज निर्माता वाग्ले र अभिनेता अनमोलबीच कागजी सम्झौता भएको छ।</p>
<p>भूवन केसी निर्माता रहने चलचित्र सुपर काजल फिल्मसको ब्यानरमा निर्माण हुनेछ। यसअघि भूवन र वाग्लेबीच चलचित्रमा अनमोललाई ल्याउने विषयमा छलफल भएको थियो। </p>
<p>अनमोलले अब ‘ए मेरो हजुर ४’ को छायांकन भ्याएपछि ‘पारस’मा काम गर्नेछन्। निर्माताबाट निर्देशक बन्न लागेका वाग्लेले फिल्मको छायांकन वैशाख दोस्रो साताबाट शुरू हुने बताए।</p>
<p>प्रदीप भारद्वाजको कथा रहेको यो चलचित्रमा यसअघि निश्चल बस्नेतलाई नायकको रूपमा राखिएको थियो। अनमोलको हातमा ‘एन्टी हिरो’ पनि छ। अब ‘एन्टी हिरो’को छायांकन धकेलिएको छ।</p>
<p>चलचित्र विकास बोर्डमा चलचित्रको नाम दर्ता गर्दा एकजना कलाकारको नाम राख्नुपर्ने नियमका कारण वाग्लेले निश्चलको नाम राखेका थिए। </p>
<p>एक दशकदेखि निर्माताको रूपमा अनुभव बटुलेका वाग्ले पहिलोपटक निर्देशक बन्न लागेका हुन्।</p>
प्रतिक्रिया दिनुहोस्
.jpg)
