राजश्व छलीको २३३ ग्राम सुनसहित सिरहामा दुईजना पक्राउ
<p>सिरहा। सिरहा प्रहरीले राजश्‍व छलीको २३३ ग्राम (१९ तोला ९७ लाल) सुनसहित दुईजनालाई पक्राउ गरेकाे छ।</p>
<p>पक्राउ पर्नेमा लहान नगरपालिका-१९ का २४ वर्षीय मोहम मोतिबुल रहमान र २१ वर्षीय मोहमद मुर्तुजा रहेका छन्।</p>
<p>सादा पोसाकमा खटिएका प्रहरी टोलीले लहान नगरपालिका-१९, छर्रापट्टि चोकबाट उनीहरूलाई पक्राउ गरेकाे जिल्ला प्रहरी कार्यालय सिरहाका प्रहरी उपरीक्षक उमाप्रसाद चतुर्वेदीले बताए।</p>
<p>उनका अनुसार रहमान र मुर्तुजा को ३८ प २६३२ नम्बरको मोटरसाइकलमा सुन लिएर लहान बजारतर्फ गइरहेका थिए।</p>
<p>चारवटा चेप्टो टुक्रा बनाएर लुकाई राखेको अवस्थामा सुन बरामद् भएको प्रहरीले जनाएको छ। बरामद् गरिएको सुनको बजार मूल्यअनुसार १५ लाख ५८ हजार रूपैयाँ रहेको प्रहरी उपरीक्षक चतुर्वेदीले बताए।</p>
<p>राजश्व छलीका सुन र पक्राउ गरिएको मोटरसाइकल गरी १६ लाख आठ हजार ७९ रूपैयाँ मूल्य कायम गरेर थप कारबाहीका लागि ठाँढी भन्सार कार्यालयमा बुझाइएको छ।</p>
प्रतिक्रिया दिनुहोस्
.jpg)
