दीक्षित भए ६३ सैनिक अधिकृत विद्यार्थी
<p>काठमाडौं। नेपाली सेनाको ‘आर्मी कमाण्ड तथा स्टाफ कलेज’ शिवपुरीबाट स्नातकोत्तर उत्तीर्ण गरेका ६३ जना सैनिक अधिकृत विद्यार्थी दीक्षित भएका छन्। </p>
<p>दीक्षान्त समारोहमा त्रिभुवन विश्वविद्यालयका उपकुलपति प्रध्यापक डा. धर्मकान्त बास्कोटाले २१औं शताब्दीमा आउन सक्ने सुरक्षा चुनौतीको सामना गर्न दीक्षित विद्यार्थीहरू सफल हुने विश्वास व्यक्त गरे।</p>
<p>कार्यक्रममा प्रधान सेनापति पूर्णचन्द्र थापाले दीक्षित विद्यार्थीहरू विश्वले चाहेको आधुनिक सैनिक जनशक्ति बन्न सफल भएको बताए। </p>
<p>कलेजको २६औं ब्याचका सैनिक अधिकृत विद्यार्थीहरूलाई आज दीक्षित गरिएको हो।</p>
<p>६३ दीक्षित विद्यार्थीमध्ये ५० जना नेपाली सेनाबाट, एकजना राष्ट्रिय अनुसन्धान विभाग, एकजना सशस्त्र प्रहरी, एकजना नेपाल प्रहरी र १० जना विभिन्न १० मुलुकका सुरक्षा निकायबाट रहेका छन्।</p>
<p>विदेशी विद्यार्थीहरू बंगलादेश, चीन, भारत, लेवनान, माल्दिभ्स, नाइजेरिया, पाकिस्तान, दक्षिण कोरिया, श्रीलंका र अमेरिकाका हुन्।</p>
<p>२०४९ मा स्थापना भएको यो कलेजबाट अहिलेसम्म एक हजार ५३ जना दीक्षित भइसकेका छन्।</p>
प्रतिक्रिया दिनुहोस्
.jpg)
