मौसम पूर्ण सुधार हुन अझै केही दिन लाग्ने
<p>काठमाडौं। मौसम पूर्ण रूपमा सुधार हुन अझै केही दिन लाग्‍ने जल तथा मौसम पूर्वानुमान महाशाखाले जनाएको छ।</p>
<p>पश्चिमी न्यून चापीय प्रणालीको प्रकृति कमजोर रहे पनि तल्लो वायुमण्डलमा स्थानीय वायुको प्रभाव रहेकाले ठाउँ-ठाउँमा बदलीसँगै हल्का वर्षा भइरहेको मौसमविद् राजु प्रधानाङ्गले बताए।</p>
<p>“अहिलेको प्रकृति हेर्दा अझै दुई/तीन दिन मौसम सुधार हुने अवस्था छैन”, उनले भने।</p>
<p>प्रधानाङ्गका अनुसार प्रि-मनसुनको अवस्था भएकोले पनि मौसम फेरबदल भइरहेको हो।</p>
<p>नेपालमा प्रि-मनसुन भित्रिने सरदर समय १ मार्च हो।</p>
<p>मार्चदेखि शुरु हुने प्रि-मनसुन मे महीनासम्म रहन्छ।</p>
<p>यस अवधिमा पहाडी भेगमा दिनभर घाम लाग्ने र अपराह्न तथा साँझपख हावाहुरी, मेघ गर्जन चट्याङसहित फाटफुट वर्षा हुने गर्दछ।</p>
<p>हाल न्यून चापीय प्रणालीको प्रभावले पश्चिमी भूभागमा सामान्यदेखि पूर्ण बदली रही केही स्थानमा मेघ गर्जन चट्याङसहित हल्का वर्षा भइरहेको छ भने बाँकी स्थानमा आंशिकदेखि सामान्य बदली रहेको छ।</p>
<p>आज राति देशको मध्य तथा पूर्वी भूभागमा साथै पश्चिमका केही स्थानमा मेघ गर्जन चट्याङसहित वर्षाको सम्भावना रहेको महाशाखाले जनाएको छ ।</p>
<p>आज काठमाडौं उपत्यकाको न्यूनतम तापक्रम छ दशमलव दुई र अधिकतम तापक्रम २३ दशमलव शून्य डिग्री रहेको छ। <em>रासस</em></p>
प्रतिक्रिया दिनुहोस्
.jpg)
