नेपाली सेनाका उपरथी हमाल संयुक्त राष्ट्रसंघको फोर्स कमाण्डर नियुक्त
<p>काठमाडौं। नेपाली सेनाका उपरथी इश्वर हमाल संयुक्त राष्ट्रसंघको फोर्स कमाण्डर नियुक्त भएका छन्।</p>
<p>राष्ट्रसंघका महासचिव एन्टोनियो गुटेरेसले उपरथी हमाललाई फोर्स कमाण्डर नियुक्त गरेका हुन्।</p>
<p>महासचिवको कार्यालयका प्रवक्ताले आज जारी गरेको विज्ञप्तिमा हमाललाई राष्ट्रसंघको हेड अफ मिसन र युनाइटेड नेसन्स डिस्इंगेज्मेन्ट अब्जर्भर फोर्स (युएनडीओएफ)को फोर्स कमाण्डर नियुक्त गरिएको उल्लेख छ।</p>
<p>राष्ट्रसंघ महासचिवका प्रवक्ताका अनुसार उपरथी हमालले अब सेनाका अर्का उपरथी शिवराम खरेलले सम्हाल्दै आएको जिम्मेवारी लिनेछन्।</p>
<p>हमालले मध्यपूर्वको सिरियाको गोलानहाइटस्थित संयुक्त राष्ट्रसंघीय शान्ति सेनाको नेतृत्व गर्नेछन्। उक्त क्षेत्रमा नेपाललगायत झण्डै ४० देशका सैनिकहरु कार्यरत रहेका छन् ।</p>
<p>खरेल संयुक्त राष्ट्रसंघका कार्यवाहक हेड अफ मिसन र युएनडीओएफको फोर्स कमाण्डरका रुपमा कार्यरत् थिए।</p>
<p>दशक लामो हिंसात्मक विद्रोहमा भएको मानवअधिकार उल्लंघनलाई कारण देखाएर राष्ट्रसंघले लामो समय नेपाली सेनालाई फोर्स कमाण्डर दिन बन्द गरेको थियो।</p>
<p>तर, पछिल्लो समय भने सेनाले फेरि नियमित रूपमा फोर्स कमाण्डर पाउन थालेको छ।</p>
प्रतिक्रिया दिनुहोस्
.jpg)
