दिल्लीमा नागरिकता कानूनविरुद्धको प्रदर्शन हिंसामा परिणत, एक प्रहरीको मृत्यु
<p>काठमाडौं। दिल्लीको यमुना पार क्षेत्रमा नागरिकता संशोधन कानूनविरुद्ध जारी प्रदर्शन हिंसामा परिणत भएको छ। </p>
<p>हिंसात्मक प्रदर्शनमा प्रहरीका एक वरिष्ठ हवल्दारको मृत्यु भएको छ। एक जना वरिष्ठ प्रहरी अधिकारी घाइते भएका छन्।</p>
<p>दिल्ली प्रहरीका अनुसार उत्तर-पूर्वी दिल्लीमा धारा १४४ लागू गरिएको छ। त्यहाँ अब मानिसहरू भेला हुन पाउने छैनन्। जाफराबाद, मौजपुर, सीलमपुर र चाँदवाग क्षेत्रमा हिंसात्मक प्रदर्शन भएको भारतीय सञ्चारमाध्यमहरूले जनाएका छन्।</p>
<p>कयौं स्थानमा ढुंगामुढा र आगजनी भएको छ। प्रदर्शन नियन्त्रणमा लिन प्रहरीले ठूलै कसरत गर्नुपरेको छ। प्रहरीले प्रदर्शनकारीलाई तितरवितर पार्न लाठी चार्ज गर्नुका साथै अश्रुग्यास प्रहार गरेको छ। </p>
<p>प्रदर्शनकारीले कतिपय घर र व्यावसायिक प्रतिष्ठानमा आगजनी गरिदिएका छन्। हिंसात्मक प्रदर्शन भएको क्षेत्रमा मुस्लिम बाहुल्यता रहेको छ।</p>
<p>दिल्ली मेट्रोका पाँच स्टेसन सुरक्षाका कारण देखाउँदै बन्द गरिएको छ। दिल्लीका मुख्यमन्त्री अरबिन्द केजरीवालले त्यहाँका लेफ्टिनेन्ट गभर्नर र केन्द्रीय गृहमन्त्रीसमक्ष शान्ति व्यवस्था कायम गर्न आग्रह गरेका छन्।</p>
<p>११ फागुनमा पनि झपराबाद मेट्रो स्टेशनमा नागरिकता संशोधन कानूनको समर्थक र विरोधीबीच हिंसात्मक झडप भएको थियो।</p>
<p>उत्तरपूर्वी दिल्लीका डीसीपी बेदप्रकाश सूर्याका अनुसार दुबै पक्षसँग प्रहरीले वार्ता गरेपछि अहिले अवस्था शान्त भएको छ।</p>
प्रतिक्रिया दिनुहोस्
.jpg)
