दिदीबहिनी कपः पुलिसलाई हराउँदै एपीएफले उचाल्याे उपाधि
<p>काठमाडौं। सरस्वती चौधरीको उत्कृष्ट प्रदर्शनमा सशस्त्र प्रहरी बलको एपीएफ क्लबले आज अर्को विभागीय क्लब पुलिसलाई ३-१ को सेटमा हराउँदै दिदीबहिनी कप राष्ट्रिय महिला भलिबल प्रतियोगिताको उपाधि जितेको छ।</p>
<p>एपीएफ पहिलो सेटमा २५-१५ ले पराजित भए पनि बाँकी सेटमा उत्कृष्ट पुनरागमन गर्न सफल भएको थियो। एपीएफले बाँकी सेटमा २५-१८, २५-११, २५-१२ को नतिजा निकालेको थियो।</p>
<p>एपीएफका प्रशिक्षक महेशप्रसाद चौधरीले डिफेन्स बिग्रिएका कारण पहिलो सेटमा गुमाउनु परेको बताए। उनले थपे, “तर पहिलो सेट हारे पनि खेलाडीले धैर्यता गुमाएनन्, जसकारण नतिजा निकाल्न सफल भयौं।”</p>
<p>पुलिस क्लबका प्रशिक्षक रूपेश बिष्टले पहिलो सेटपछि खेलाडीको तालमेल बिग्रँदा उपाधिबाट वञ्चित हुनु परेको बताए।</p>
<p>एपीएफले न्यू डायमण्ड स्पोर्टस् क्लबलाई ३-० को सोझो सेटमा हराउँदै उपाधि भिडन्त पक्का गरेको थियो भने पुलिस क्लबले त्रिभुवन आर्मीलाई ३-० कै सेटमा हराउँदै फाइनलमा स्थान बनाएको थियो।</p>
<p>उपाधिसँगै एपीएफले दुई लाख रूपैयाँ पुरस्कार हात पार्‍यो। दोस्रो हुने पुलिस क्लबले एक लाख तथा तेस्रो हुने न्यू डायमण्डले ५० हजार रूपैयाँ पुरस्कार जित्यो।</p>
<p>आजै तेस्रो स्थानको लागि भएको खेलमा न्यू डायमण्डले त्रिभुवन आर्मीलाई ३-० को सोझो सेटमा हराएको थियो। न्यू डायमण्डले त्रिभुवन आर्मीविरुद्ध २५-२३, २५-२१, २५-२२ को सहज नतिजा निकालेको थियो।</p>
<p>एपीएफकी सरस्वती प्रतियोगिताको सर्वोत्कृष्ट खेलाडी घोषित भइन्। उनले १० हजार रूपैयाँ नगद पुरस्कार पाइन्।</p>
<p>विधागतरूपमा न्यू डायमण्डकी पनामिका राई उत्कृष्ट सर्भर र सलिना श्रेष्ठ उत्कृष्ट लिबेरो घोषित भए। पुलिस क्लबकी कमला पुन उत्कृष्ट लिफ्टर र कोपिला राना उत्कृष्ट ब्लकर घोषित भइन्।</p>
<p>एपीएफकी निरुता ठगुन्ना उत्कृष्ट स्पाइकर घोषित भइन्। एपीएफकै महेश चौधरी उत्कृष्ट प्रशिक्षक घोषित भए। विधागतमा उत्कृष्ट हुनेले पाँच हजार रूपैयाँ पुरस्कार पाए।</p>
प्रतिक्रिया दिनुहोस्
.jpg)
