खप्तड गोल्डकपः कञ्चनजंघाकाे विजयी शुरूआत
<p>कैलाली। कञ्चनजंघा फुटबल क्लब भारतले चौथो संस्करणको नेपाल आइस सुदूरपश्चिम अन्तर्राष्ट्रिय आमन्त्रण खप्तड गोल्डकपमा विजयी शुरूआत गरेकाे छ।</p>
<p>टाइब्रेकरमा बागमती क्लब सिराहालाई ४-२ ले पराजित गर्दै कञ्चनजंघाले अन्तिम आठमा स्थान बनाएकाे हाे।</p>
<p>निर्धारित ७० मिनेटकाे खेलमा कुनै टीमबाट पनि गोल नभएपछि टाइब्रेकरमार्फत् नतिजा निकालिएको थियाे।</p>
<p>२ बजे उद्घाटन खेल शुरू हुने बताए पनि निर्धारित समयमा खेल नहुँदा समय घटाइएकाे थियाे।</p>
<p>जितसँगै कञ्चनजंघाले १३ फागुनमा हुने आयोजक सुदूरपश्चिम-११ स्पोर्टस् क्लबसँगको भेट पक्का गरेको छ।</p>
<p>प्रतियोगिताअन्तर्गत भाेलि, १० फागुनमा न्यूरोड टीम (एनआरटी) र एपीएफबीच प्रतिस्पर्धा हुनेछ।</p>
<p>प्रतियाेगितामा नेपाल र भारतका गरी १२ क्लबको सहभागिता छ। प्रतियोगिता २० फागुनसम्म सञ्चालन हुनेछ।</p>
<p>प्रतियोगिताको विजेताले २१ लाख एक रूपैयाँ तथा उपविजेताले १० लाख एक रूपैयाँ प्राप्त गर्नेछन्।</p>
<p>धनगढी रगशालामा भइरहेकाे प्रतियोगिताको उत्कृष्ट खेलाडीलाई मोटरसाइकल, विभिन्न विधाका उत्कृष्ट खेलाडीलाई १५/१५ हजार र प्रत्येक खेलको म्यान अफ दी म्याचलाई १०/१० हजार रूपैयाँ पुरस्कार प्रदान गरिनेछ।</p>
<p>प्रतियोगिताको उद्घाटन सुदूरपश्चिमका मुख्यमन्त्री त्रिलोचन भट्टले गरेका थिए।</p>
प्रतिक्रिया दिनुहोस्
.jpg)
