मुटु परीक्षणका लागि प्रधानमन्त्री ओली मनमोहन सेन्टरमा
<p>काठमाडौं। प्रधानमन्त्री केपी शर्मा ओली स्वास्थ्य परीक्षणका लागि चिकित्साशास्त्र अध्ययन संस्थानको महाराजगञ्जस्थित मनमोहन कार्डियोथोरासिक भास्कुलर एन्ड ट्रान्स्प्लान्ट सेन्टरमा पुगेका छन्।</p>
<p>प्रधानमन्त्री ओलीका प्रेस सल्लाहकार सूर्य थापाले मुटुको नियमित परीक्षणका लागि प्रधानमन्त्री ओली सेन्टरमा पुगेको <em>देखापढी</em>लाई बताए।</p>
<p>“उहाँले विभिन्न अंगको नियमित परीक्षण गराउँदै आउनु भएको छ, त्यहीक्रममा आज मुटुको नियमित परीक्षण गर्न आउनु भएको हो”, थापाले भने, “परीक्षणपछि उहाँ आजै निवास फर्कनुहुनेछ।”</p>
<p>सेन्टरमा प्रधानमन्त्री ओलीलाई हेर्दै आएको चिकित्सकको टीमले परीक्षण गरिरहेको उनले बताए।</p>
<p>प्रधानमन्त्री ओलीको केही समयअघि सेन्टरमै एपेन्डिसाइटिसको आकस्मिक शल्यक्रिया गरिएको थियो।</p>
<p>१२ वर्षअघि मिर्गौला प्रत्यारोपण गरेका प्रधानमन्त्री ओलीको मिर्गौलामा समस्या आएपछि पछिल्लो समय नियमित डायलासिस गरिंदै आएको छ।</p>
<p>प्रधानमन्त्री ओलीले केही समयअघि सम्पादकहरूसँगको भेटमा आफूले चाँडै मिर्गौला प्रत्यारोपण गर्ने बताएका थिए।</p>
प्रतिक्रिया दिनुहोस्
.jpg)
