अछाम कारागारमा सुतेकै ठाउँमा एक कैदी मृत भेटिए
<p>अछाम। जिल्ला कारागारमा सुतेको अवस्थामा एक कैदी मृत भेटिएका छन्।</p>
<p>कर्तव्य ज्यान मुद्दामा कैद भुक्तान गरिरहेका पञ्चदेवल-विनायक नगरपालिका-६ तोलिका ४२ वर्षीय जितेन्द्र विक कारागारभित्रै मृतावस्थामा भेटिएका हुन्।</p>
<p>आज बिहान अबेरसम्म नउठेपछि साथीहरूले हेर्दा विक मृतावस्थामा फेला परेको जिल्ला प्रहरी कार्यालय अछामका डीएसपी दीपक भारतीले जानकारी दिए।</p>
<p>मृतकका आफन्तलाई खबर गरिसकिएकाले उनीहरू आइसकेपछि शव परीक्षण गरिने प्रहरीले बताएको छ।</p>
<p>प्रहरीले मृत्युको कारण खुल्न नसकेको र घटनाको अनुसन्धान भइरहेको बताएको छ।</p>
<p> भदौ २०६६ मा जेल परेका विकले १० वर्ष ६ महीना कैद भुक्तानी गरिसकेका र जेलबाट छुट्न सिफारिस हुने प्रक्रयामा थिए। <em>रासस</em></p>
प्रतिक्रिया दिनुहोस्
.jpg)
