राप्ती र नारायणी नदीमा तीन गोही मरे, सातवटा जालमा
<p>चितवन। राप्ती र नारायणी नदीमा गतवर्ष छाडिएका तीन गोही मरेका छन्।</p>
<p>चितवन राष्ट्रिय निकुञ्ज हुँदै बगेका यी दुई नदी र भङ्गालाहरुमा गरिएको अनुगमनका क्रममा सात गोही जालमा बेरिएको अवस्थामा समेत फेला परेका छन्।</p>
<p>निकुञ्जका सहायक संरक्षण अधिकृत वेदबहादुर खड्काका अनुसार नारायणीको गोलाघाट क्षेत्रमा दुईवटा र राप्तीको बाराही होटलनजिकै एउटा गोही मृत भेटिएको हो।</p>
<p>ती गोही मर्नुका कारण पत्ता लगाउन पोष्टमार्टम गर्न अंग पठाइएको छ ।</p>
<p>उनले भने, “मर्नुको कारण यहाँ पत्ता नलागे विदेशी विज्ञहरुसँगसमेत परामर्श गर्ने तयारीमा छौँ ।” </p>
<p>यसअघि यसै वर्ष दुईवटा गोही मरेको अवस्थामा भेटिएको थियो। संरक्षण अधिकृत खड्काका अनुसार भदौमा राप्तीको ढुङ्ग्रे खोलामा पुछर मात्रै फेला परेको थियो।</p>
<p>त्यस्तै असोजमा निलडामसहित अमलटारी क्षेत्रमा नारायणी नदीमा एउटा गोही फेला परेको थियो।</p>
<p>यी दुवै गोही सेटेलाइट जडान गरी छाडिएका हुन्। मानिसले गोही मारेर खाएको आशंका समेत गरिएको छ। </p>
<p>राप्तीमा चारवटा र नारायणीमा तीन गोही जालमा बेरिएको अवस्थामा भेटिएका छन्।</p>
<p>ती गोहीलाई नियन्त्रणमा लिएर आजबाट जाल हटाइने निकुञ्जले जनाएको छ।</p>
<p>अनुगमनका क्रममा नारायणीमा चार वटा र राप्तीमा एउटा भाले गोही फेला परेका छन् ।</p>
<p>विश्वबाट नै लोप हुन लागेको घडियाल गोहीलाई निकुञ्जको कसरामा रहेको प्रजनन् केन्द्रमा हुर्काएर हालसम्म एक हजार ४६५ वटा गोही विभिन्न नदीमा छाडिसकिएको छ।</p>
<p>ती मध्ये राप्तीमा मात्र ७८५ गोही छाडिएको छ ।<br />
<br />
निकुञ्जका अनुसार नारायणी नदीमा ३९९, कालीगण्डकीमा ३५, सप्तकोशीमा ९५, कर्णालीमा ४१ र बबहीमा ११० वटा गोही छोडिएको छ। पछिल्ला वर्षहरुमा राप्ती र नारायणीमा मात्रै गोही छाडिने गरिएको छ ।</p>
<p>पछिल्लो गणनाअनुसार राप्तीमा ११८ र नारायणीमा १०१ गोही रहेका छन् ।<br />
<br />
सन् १९७८ मा प्रजनन् केन्द्र स्थापना भएपछि गोहीका बच्चा हुर्काएर सन् १९८१ बाट नदीमा छोड्न थालिएको हो। </p>
<p>नदी प्रदूषण बन्दै जाँदा घडियाल संरक्षणमा चुनौती थपिँदै गएको छ।</p>
<p>हरेक वर्ष यी दुई नदी किनारबाट गोहीको अण्डा संकलन गरी प्रजनन् केन्द्रमा कोरलेर हुर्काउने गरिन्छ। <em>रासस</em></p>
प्रतिक्रिया दिनुहोस्
.jpg)
