बालुवाटार जग्गा प्रकरण : बिचौलियाबाट ठगिएको भन्दै गृह मन्त्रालयले दियो किटानी जाहेरी
<p>काठमाडौं। बालुवाटार जग्गा हिनामिना अनुसन्धानका लागि गृह मन्त्रालयले प्रहरीमा जाहेरी पठाएको छ।</p>
<p>सरकारका तर्फबाट गृहले ठगीसम्बन्धी मुद्दामा किटानी जाहेरी दिएको हो।</p>
<p>आजको नयाँ पत्रिका दैनिकका अनुसार ठगी मुद्दामा सरकारले जाहेरी दिएको यो पहिलो घटना हो।</p>
<p>प्रहरीको केन्द्रीय अनुसन्धान ब्युरो (सिआइबी)ले जग्गा हिनामिनामा संलग्नलाई ठगी र किर्तेसम्बन्धी मुद्दा चलाउनुपर्ने भन्दै दुई साताअघि गृहमा प्रतिवेदन बुझाएको थियो।</p>
<p>ठगी मुद्दा चलाउन जाहेरी अनिवार्य चाहिन्छ। हाल खारेज भइसकेको नेपाल समरजंग कम्पनीसमेत गृहमातहतकै निकाय भएकाले मन्त्रालयको तर्फबाट जाहेरी परेको हो।</p>
<p>गृह मन्त्रालयका एक उच्च अधिकारीले जाहेरी पठाइसकेको बताए। तर, उनले को–कोविरुद्ध किटानी जाहेरी छ भन्ने खुलाउन चाहेनन्।</p>
<p>यो प्रकरणमा बिचौलियाबाट सरकार नै ठगिएको भन्दै मुद्दा दायर हुन लागेको हो ।</p>
<p>समरजंग कम्पनीको नाममा रहेको बालुवाटारको करीब १३६ रोपनी जग्गा चारपटक गरेर विभिन्न व्यक्तिको नाममा लगिएको थियो।</p>
<p>त्यसमा संलग्न ११० जना र जग्गा किन्ने ६५ जनाविरुद्ध २२ माघमा अख्तियार दुरुपयोग अनुसन्धान आयोगले मुद्दा दायर गरिसकेको छ।</p>
प्रतिक्रिया दिनुहोस्
.jpg)
