सिके राउतको आरोप- ‘नेकपादेखि राजपासम्म म्याद गुज्रेका पार्टी’
<p>सिरहा। जनमत पार्टीका अध्यक्ष सिके राउतले नेकपादेखि राजपासम्म म्याद गुज्रेका पार्टी रहेको आरोप लगाएका छन्।</p>
<p>नेकपा, नेपाली कांग्रेस, समाजवादी, राजपा लगायतका पार्टीहरू म्याद गुज्रेको औषधीझैं भएको राउतको आरोप छ।</p>
<p>“कांग्रेस ७० वर्ष, एमाले ३० वर्ष, समाजवादी र राजपा १३ वर्ष पूरानो म्याद गुज्रेको पार्टी हो”, सिरहामा आयोजित कार्यक्रमलाई सम्बोधन गर्दै उनले भने, “अब नयाँ मोबाइलको आवश्यकता भएझैं जनमत पार्टीको आवश्यकता देखिएको छ।”</p>
<p>मधेसवादी पार्टी जस्तै आफूले नेतासँग नभएर सरकारसँग सम्झौता गरेको बताउँदै उनले त्यो सम्झौता नै विजयीको शुरूआत भएको दाबी पनि गरे। </p>
<p>“म्याद गुज्रेका औषधी खानु हुँदैन”, राउतले भने, “पुराना पार्टीलाई देशको बागडोर दिएर परिवर्तन हुँदैन। दूरगामी सोंच र योजनासाथ बढेको पार्टीलाई समर्थन गर्नुपर्छ।”</p>
<p>कार्यक्रममा जनमत पार्टीका केन्द्रीय सदस्य अब्दुल खानले नेपाल कम्युनिष्ट पार्टी (नेकपा) आतंकवादीको पार्टी भएको टिप्पणी गरे। </p>
<p>उनले विपी कोईरालाले पदको लागि पार्टी बनाएको भन्दै दलाली, चाकरी र कुर्सीको लागि भारतमा बसेर पार्टी बनाएको आरोप लगाए।</p>
<p>खानले समाजवादी पार्टीका अध्यक्ष उपेन्द्र यादवलाई ‘कंस मामा’को संज्ञा दिए।</p>
<p>यस्तै राष्ट्रिय जनता पार्टीका नेताहरू श्रीमती र आफन्तलाई सांसद, मन्त्री बनाउनमै केन्द्रित रहेको आरोप लगाए।<br />
</p>
प्रतिक्रिया दिनुहोस्
.jpg)
