आईजीपी ज्ञवालीको निर्देशन- सुरक्षा चुनौती समाधान गर्न आक्रामक रूपमा प्रस्तुत हुनुस्
<p>काठमाडौं। प्रहरी महानिरीक्षक ठाकुरप्रसाद ज्ञवालीले सातवटै प्रदेश प्रहरी कार्यालयका निमित्त प्रमुखहरूलाई सुरक्षा चुनौतीहरूको समाधान गर्न उच्च सर्तकताका साथ प्रहरी परिचालन गरेर आक्रामक रूपमा प्रस्तुत हुन निर्देशन दिएका छन्।</p>
<p>प्रहरी प्रधान कार्यालयबाट भिडिओ कन्फेरेन्सद्वारा उनले यस्तो निर्देशन दिएका हुन्। शान्ति सुरक्षा तथा समसामयिक विषयमा सम्बोधन गर्दै उनले जस्तोसुकै सुरक्षा चुनौतीलाई समाधान गर्न प्रहरी सक्षम रहेको प्रष्ट पारे।</p>
<p>आवश्यकता अनुसार प्रदेश सरकार, सम्बन्धित निकाय, स्थानीय तह, स्थानीय प्रशासनसँगसमेत समन्वय गरी उच्च प्रतिफल आउने गरी काम गर्न उनले निर्देशन दिएका हुन्।</p>
<p>प्रहरी महानिरीक्षक ज्ञवालीले कुनै पनि घटना, दुर्घटना भएमा तत्काल आवश्यकता अनुसार प्रहरी परिचालन गरी विधि तथा प्रक्रियासम्मत रूपमा कानूनी कारबाही अगाडि बढाउनुपर्ने बताए। </p>
<p>सबै प्रदेशका प्रहरी प्रमुखहरूले आ–आफ्नो प्रदेशको सुरक्षा चुनौतीको पहिचान गरी उच्च रणनीतिकासाथ समस्या समाधानमा लाग्न उनले निर्देशन दिए। </p>
<p>प्रहरी कारबाहीको क्रममा मानवअधिकारको संरक्षण गर्नुपर्नेमा जोड दिँदै प्रहरी महानिरीक्षक ज्ञवालीले हिंसाजन्य क्रियाकलापमा प्रहरीको संलग्नता अक्षम्य हुने बताए। </p>
<p>राजमार्ग अवरोध, अवाञ्छित गतिविधि लगायत अन्य अपराधिक गतिविधि नियन्त्रणमा पूर्ण सक्रियताका साथ खटिन पनि उनको निर्देशन छ। </p>
<p>अन्तरक्रियाको क्रममा प्रदेश प्रहरी कार्यालयका निमित्त प्रमुखहरुले आ–आफ्नो प्रदेशको शान्ति सुरक्षा एवं प्रहरीका काम कारबाहीका बारेमा जानकारी दिएका थिए। </p>
<p>प्रदेश प्रहरी प्रमुख रहेका ४ प्रदेशका डीआईजीहरूले २९ माघबाटै अनिवार्य अवकाश पाइसकेकाले त्यहाँ निमित्त प्रमुख रहेका छन्। ७ नम्बर प्रदेश र २ नम्बर प्रदेशमा भने यसअघि नै कार्यरत रहेका डीआईजीहरू छन्। </p>
<p>आईजीपी ज्ञवाली १ नम्बर प्रदेशका प्रमुख थिए। उनी २८ माघमा आईजी भएपछि त्यहाँ पनि अहिले डीआईजी छैनन्।</p>
प्रतिक्रिया दिनुहोस्
.jpg)
