काठमाडौं महानगरपालिकाले अब रात्रिकालीन बस चलाउने
<p>काठमाडौं । काठमाडौं महानगरपालिकाले आउँदो वैशाखदेखि रात्रिकालीन सार्वजनिक यातायात सञ्चालन गर्ने भएको छ। आज महानगर प्रमुख विद्यासुन्दर शाक्य र अन्य सरोकारवालासँगको बैठकले यस्तो निणय गरेको हो। </p>
<p>सार्वजनिक यातायातलाई थप प्रभावकारी बनाउन र नेपाल भ्रमण वर्ष २०२० का अवसरमा नेपाल घुम्न आएका विदेशी पाहुनालाइ पनि सहयोग होस् भन्दै कामपाले रातको समयमा पनि सार्वजनिक यातायात सञ्चालन गर्न लागेको हो। </p>
<p>मेयर शाक्यले नयाँ वर्षको शुरूआतसँगै पहिलो चरणमा बेलुका ८ बजेदेखि ११ बजेसम्म सेवा शुरू गर्नेगरी कार्यदल नै गठन गरेर अघि बढ्ने प्रतिबद्धता व्यक्त गरे। विगतमा १ भदौ २०६९ देखि रात्रिकालीन सार्वजनिक यातायात सञ्चालनमा आए पनि करीब १८ महीनापछि सेवा बन्द भएको थियो। </p>
<p>मेयर शाक्यले शुरूमा व्यवस्थापनका लागि पर्ने आवश्यकता पूरा गर्न महानगरपालिका तयार रहेको भन्दै दीर्घकालीन सेवा दिने गरी योजना बनाएर तयार रहन नेपाल यातायात व्यवसायी राष्ट्रिय महासङ्घलाई आग्रह गरे। </p>
<p>बैठकमा पहिलो चरणमा रत्नपार्कलाई केन्द्रित गरेर छिमेकी नगरपालिकाहरू तथा ललितपुर र भक्तपुरमा समेत सेवा पुर्‍याउने गरी १५ वटा रुट बनाएर सेवा दिने निर्णय गरेको छ। शुरूमा कम्तीमा पनि ६० ओटा बस दैनिक सञ्चालन गर्न सकिने जनाइएको छ। </p>
<p>यातायात व्यवस्था विभागका महानिर्देशक गोगनबहादुर हमालले पनि कार्यदल बनाएर विवाद नआउने गरी समाधानको बाटो खोज्न तयार रहेको भन्दै सेवा दीर्घकालीन गर्ने कुराको सुनिश्चित महासङ्घले गर्नुपर्ने बताए। </p>
<p>महानगरीय प्रहरी कार्यालय रानीपोखरीका प्रहरी उपरीक्षक विमल बस्नेतले नेपाल भ्रमण वर्षलाई केन्द्रित गरेर महानगरभित्रका पर्यटकीय क्षेत्रमा पनि विदेशी पाहुनालाई सहज आगमन र अबेरसम्म हिँडडुलका लागि सेवा प्रभावकारी हुने गरी योजना बनाएर अघि बढ्नुपर्ने बताए।</p>
<p>काठमाडौं महानगरपालिकाका शहरी सु–व्यवस्था विभागका प्रमुख हरि कुँवरले पनि अब कार्यदल नै बनाएर छिट्टै अघि बढ्ने बताए। <em>रासस </em></p>
प्रतिक्रिया दिनुहोस्
.jpg)
