हुम्लामा कर्णाली नदी तर्न अझै तुइनको भर
<p>काठमाडौं। सरकारले तुइन विस्थापित गर्दै झोलुंगे पुलको योजना अघि सारेको दुई वर्ष भइसक्यो। हुम्लाको खार्पुनाथ गाउँपालिकाका लागि भने अझै विकल्प छैन।</p>
<p>कर्णाली नदी तर्न बोक्चेगौंडाका गाउँलेले तुइनकै भर पर्नुपर्छ। त्यो पनि निःशुल्क होइन, प्रतिव्यक्ति १०० रूपैयाँ तिरेर।</p>
<p>सय रूपैयाँ तिरे तुइनबाट वारिपारि गर्नेहरूले सामान तारेबापत थप ५० रूपैयाँ तिर्नुपर्छ।</p>
<p>“पुरानो र धराप छ, तुइनबाट वारिपारि गर्दा भगवानको नाम जप्छौं,”स्थानीय काली विकाले भनिन्, “पैसा नहुनेले वारिपारि गर्न पाउँदैनन्।”</p>
<p>कर्णाली नदीमा बाह्रै महीना बहाव उच्च हुने भएकाले पानी छिचोलेर तर्न सकिँदैन।</p>
<p>खार्पुनाथका अधिकांश वडाका वासिन्दाले गााउँपालिकाको केन्द्र याङ्चु पुग्न तुइनबाट कर्णाली तर्नैपर्छ।</p>
<p>आजको कान्तिपुर दैनिकका अनुसार उक्त तुइनकै बाटो भएर थाली, राया, छिप्रा र कारामलगायत गाउँका वासिन्दा याङ्चु र छिमेकी जिल्लाहरू जुम्ला, बाजुरा पुग्छन्।</p>
<p>स्थानीय व्यापारीले सदरमुकाम सिमकोट टाढा हुँदा दैनिक उपभोग्य सामग्री तथा खाद्यान्न जुम्ला र बाजुराबाटै ल्याउने गरेका छन्।</p>
<p>अप्ठेरो बाटोमा जोखिम मोलेर यात्रा गर्न नसकिने भएपछि तुइन गर्नुको विकल्प नभएको स्थानीय बरी महतराले गुनासो गरिन्।</p>
<p>कर्णाली करिडोरअन्तर्गतको खापु-सुनखाडा खण्डको बोक्चेगौडामा सडक निर्माणका क्रममा आवागमन अवरुद्ध भएपछि स्थानीयले रकम संकलन गरेर तुइन निर्माण गरेको गाउापालिका अध्यक्ष कर्ण रावलले बताए।</p>
प्रतिक्रिया दिनुहोस्
.jpg)
