कपिलवस्तुमा बालिकालाई बन्धक बनाएर बलात्कार, पक्राउ पुर्जी जारी भएपछि आरोपी फरार
<p>काठमाडौं। कपिलवस्तुमा सुर्तीजन्य सामग्रीको व्यवसाय गर्दै आएका अर्जुन श्रेष्ठविरुद्ध नाबालिकालाई बन्धक बनाएर बलात्कार गरेको आरोपमा पक्राउ पुर्जी जारी भएको छ।</p>
<p>आफूलाई पत्रकारसमेत बताउने श्रेष्ठमाथि बालिकालाई बलात्कार गरेको आरोप लागेको हो। बुटवलनिवासी श्रेष्ठ व्यापारका सिलसिलामा दुई वर्षयता तौलिहवामा बस्दै आएका छन्।</p>
<p>कपिलवस्तुको तौलिहवामा सुर्तीजन्य सामग्रीको व्यवसाय गर्दै आएका श्रेष्ठले आफूले काम गर्न राखेकी १५ वर्षीया बालिकालाई दुई-चार महीनादेखि लगातार बलात्कार गर्दै आएको खुलेको छ।</p>
<p>कपिलवस्तुका प्रहरी प्रमुख, प्रहरी उपरीक्षक (एसपी) दीपशमशेर राणाले श्रेष्ठलाई पक्राउ गर्न अदालतबाट अनुमति लिइएको र लगत्तै उनी फरार भएको <em>देखापढी</em>लाई बताए।</p>
<p>“पछिल्लो पटक बालिकाको हातखुट्टा खाटमा बाँधेर, मुखमा मोजा कोचेर बलात्कार गरेको पाइएको छ”, एसपी राणाले <em>देखापढी</em>सँग भने, “पक्राउ पुर्जी जारी भएसँगै आरोपी फरार भएको छ, हामीले खोजी जारी राखेका छौं।”</p>
<p>एसपी राणाले बालिकाको स्वास्थ्य परीक्षणपछि परिवारको जिम्मा लगाइएको बताए। पीडितका बुबाले जाहेरी दिएपछि प्रहरीले पक्राउ गर्न अदालतबाट अनुमति लिएकाे थियाे।</p>
प्रतिक्रिया दिनुहोस्
.jpg)
