एपीएफको सहज जित
<p>काठमाडौं। आशिष लामा र प्रविणकुमार स्याङतानको समान दुई गोलमा सशत्र प्रहरी बलको एपीएफ क्लबले आज शहीद स्मारक ‘ए’ डिभिजन लिगमा फ्रेण्ड्स क्लबमाथि ५-३ को सहज जित निकालेको छ।</p>
<p>आशिष लामाले १३औं मिनेटमा गरेको गोलमा एपीएफले अग्रता लियो।</p>
<p>नविन लामाको फ्रिकिकमा आशिषले हेडमार्फत गोल गरेका थिए।</p>
<p>४०औं मिनेटमा आशिषले एपीएफको अग्रता दोब्बर बनाए। फ्रेण्ड्सका गोलकिपर सोजित गुरुङले गरेको गल्तिमा आशिषले गोल गरेका थिए।</p>
<p>यससँगै आशिष लिगमा सबभन्दा धेरै गोल गर्ने खेलाडी बनेका छन्। आशिषको गोल संख्या आठ पुगेको छ।</p>
<p>दोस्रो स्थानमा रहेका च्यासल युथका सन्तोष साहुखलको सात गोल छ। त्रिभुवन आर्मीका नवयुग श्रेष्ठको ६ गोल छ।</p>
<p>दोस्रो हाफमा सुधारिएको प्रदर्शन गरेको फ्रेण्ड्सका फिलिप डी सुजाले ६८औं मिनेटमा गोल गरे।</p>
<p>७०औं मिनेटमा विश्व अधिकारीले बराबरी गोल फर्काए। तर त्यसको एक मिनेट वित्न नपाउँदै प्रवीणकुमारको गोलमा एपीएफले पुनः अग्रता लियो।</p>
<p>इन्जुरी समयमा कप्तान टोपबहादुर विष्ट र प्रविणकुमारले एक एक गोल गरेपछि एपीएफ सहज जित निकाल्न सफल भयो।</p>
<p>लिगमा १२ खेल सकिँदा एपीएफको यो दोस्रो जित हो। एपीएफले दुई खेल बराबरी खेलेको छ भने आठ खेलमा पराजित भएको छ।</p>
<p>आठ अंक जोडेको एपीएफले रेलिगेशन सम्भावना टार्ने संकेत गरेको छ। रेलिगेशन क्षेत्रमा चार अंकका साथ सरस्वती युथ क्लब छ।</p>
<p>फ्रेण्ड्स क्लब भने १४ अंकका साथ नवौं स्थानमा छ। फ्रेण्ड्सको यो छैटौं हार हो।</p>
<p>एपीएफले अब ब्रिगेड ब्वाइज क्लबसँग खेल्न बाँकी छ। फ्रेण्ड्सले लिगको अन्तिम खेल नेपाल पुलिस क्लबसँग खेल्नेछ।</p>
<p>आजै एन्फा मुख्यालयको मैदानमा सरस्वती युथले च्यासल युथसँग प्रतिस्पर्धा गर्नेछ भने संकटाले मछिन्द्र क्लबविरुद्ध खेल्नेछ।</p>
प्रतिक्रिया दिनुहोस्
.jpg)
