निर्मला पन्त प्रकरणमा एआईजीको प्रतिवेदन खारेज, दिलीप नै दोषी
<p>काठमाडौं। प्रहरी प्रधान कार्यालयले कंचनपुरकी १३ वर्षीया किशोरी निर्मला पन्तको बलात्कार र हत्या प्रकरणमा एआईजी धिरु बस्न्यात नेतृत्वको समितिले बुझाएको प्रतिवेदन खारेज गरेको छ।</p>
<p>डीआईजी सुरज केसी नेतृत्वमा गठित पुनरावलोकन समितिको पछिल्लो प्रतिवेदन स्वीकार गर्दै अघिल्लो प्रतिवेदन खारेज गरिएको हो।</p>
<p>पछिल्लो प्रतिवेदनअनुसार बलात्कार र हत्या आरोपमा पक्राउ परेर छुटेका दिलीपसिंह विष्ट नै मुख्य अभियुक्त रहेकाले उनीमाथि थप अनुसन्धान गर्न प्रहरी प्रधान कार्यालयले अपराध अनुसन्धान विभागमार्फत कंचनपुर प्रहरीलाई २६ माघमा निर्देशन दिएको छ।</p>
<p>भीमदत्त नगरपालिका–२ स्थित खोल्टीकी पन्तको शव ११ साउन २०७५ मा त्यही नगरपालिकाको वडा नम्बर १८ स्थित निम्बुखेडा खोला किनारको उखुबारीमा फेला परेको थियो।</p>
<p>प्रहरीको केन्द्रीय अनुसन्धान ब्यूरो (सीआईबी) र कंचनपुर प्रहरीले घटना अनुसन्धान गर्ने क्रममा ३ भदौमा विष्ट पक्राउ परेका थिए।</p>
<p>तर विष्ट निर्दोष रहेको दाबीसहित विभिन्न संघसंस्था र स्थानीयवासीले फसाउन खोजिएको आरोप लगाएका थिए। प्रहरी अनुसन्धानले भने विष्ट नै दोषी भएको निष्कर्ष निकालेको थियो।</p>
<p>गृह मन्त्रालयका सहसचिव हरिप्रसाद मैनाली नेतृत्वको समिति र एआईजी बस्न्यातको आन्तरिक समितिका प्रतिवेदनले विष्टलाई निर्दोष भनेका थिए।</p>
<p>दुवै प्रतिवेदन र कंचनपुर प्रहरीको अनुसन्धान बाझिएपछि घटनाका अभियुक्त कानूनी दायरामा आउन सकेका छैनन्।</p>
<p>प्रहरी महानिरीक्षक सर्वेन्द्र खनालले एआईजी बस्न्यातको संयोजकत्वमा ३१ भदौ २०७५ मा आन्तरिक अनुसन्धान समिति गठन गरेका थिए।</p>
<p>बस्न्यात र मैनाली नेतृत्व समितिको प्रतिवेदनको आधारमा गृह मन्त्रालयले बलात्कार र हत्या आरोपितलाई उन्मुक्ति दिन सघाएको भन्दै केही प्रहरी अधिकारीलाई बर्खास्त तथा निलम्बनसमेत गरिएको थियो।</p>
<p>त्यही समितिले आरोपित विष्टलाई उन्मुक्ति दिएको आजको कान्तिपुर दैनिकमा समाचार छ।</p>
<p>तर, पछिल्लो समितिले बस्न्यात समितिले प्रहरी र सरकारविरोधी धारणाबाट प्रभावित भएर सत्यतथ्य पत्ता लगाउन नसकेको निष्कर्ष निकालेको छ।</p>
प्रतिक्रिया दिनुहोस्
.jpg)
