‘अनुभवका अनुभूतिहरू’ लोकार्पण
<p>काठमाडाैं। प्राध्यापक तथा पत्रकार डा. दुर्गा दाहालको कविता सङ्ग्रह ‘अनुभवका अनुभूतिहरू’को लोकार्पण गरिएको छ। अन्तर्राष्ट्रिय नेपाली साहित्य समाज नेपालले प्रकाशनमा ल्याएको कृतिको वरिष्ठ कवि तुल्सी दिवसले लोकार्पण गरे।</p>
<p>उनले विदेशमा रहेर पनि लेखकले साहित्यिक कृतिको माध्यमबाट देशलाई योगदान पुर्‍याएको भन्दै बाहिर बसेपछि देशलाई बुझ्न सजिलो हुने धारणा राखे।</p>
<p>दिवसले लेखकले सूक्ष्म ढङ्गले मानवीय संवेदनालाई कृतिमा समेट्न सफल रहेको भन्दै प्रकृति, संस्कृति र विभिन्न कुरीतिसँग जोडिएका पक्षलाई कवितामा उतारेको बताए।</p>
<p>कृतिमाथि टिप्पणी गर्दै प्राध्यापक डा. लक्ष्मण गौतमले कविले यस कृतिमा सकारात्मक सोचको भावनालाई प्रतिविम्बित गरेको बताए।</p>
<p>अर्का टिप्पणीकार गीता कार्कीले लेखकले प्रेरणा र मानवीयताको महत्त्वलाई उच्चतम ढङ्गले स्थान दिएको बताइन्।</p>
<p>समाजका अध्यक्ष राधेश्याम लेकालीले राजनीतिमा सुधार ल्याउन श्रष्टाहरू सत्तासम्म पुग्नुपर्ने धारणा राखे।</p>
<p>सोही अवसरमा दाहालको शब्द रहेको गीति एल्बम ‘माया’ पनि सार्वजनिक गरियो। गीतमा आनन्द कार्कीको स्वर र सरोज प्याकुरेलको संगीत रहेको छ। <em>रासस</em></p>
प्रतिक्रिया दिनुहोस्
.jpg)
