अफगानिस्तानमा दुई अमेरिकी सैनिकको मृत्यु
<p>अफगानिस्तान। हतियारधारी एक अफगानी सैनिकले चलाएको गोली लागेर अफगानिस्तानमा तैनाथ दुईजना अमेरिकी सैनिकको मृत्यु हुनुका साथै अरु ६ जना घाइते भएका छन्।</p>
<p>अमेरिकी सेनाका अनुसार अफगानिस्तानको पूर्वी नान्गारहार प्रान्तमा उक्त दुःखद घटना भएको हो। शरजाद जिल्लाको सैनिक अखडामा अमेरिकी र अफगान कमान्डोहरूले तालिम गरिरहेका बखत अफगान सैनिक कमान्डोले गोली चलाएका थिए।</p>
<p>अमेरिकी राष्ट्रपति डोनाल्ड ट्रम्पले १८ वर्ष लामो अफगान युद्ध समाप्त गरी अमेरिकी सैनिक स्वदेश फर्काउने योजना बनाइरहेको नाजुक समयमा उक्त घटना भएको हो।</p>
<p>अफगानिस्तानमा तैनाथ अमेरिकी फौजका प्रवक्ता सोन्नी लेगिटले आज जारी गरेकाे वक्तव्यमा अफगानी सैनिकले चलाएको गोलीबाट अमेरिकी सैनिकको मृत्यु भएको र केही घाइते भएको उल्लेख छ।</p>
<p>प्रान्तीय गभर्नर शाह महमूद मियाखिलले अफगान सैनिकको आक्रमणबाट तीनजना अफगान सैनिक पनि घाइते भएको बताउँदै घटनाको अनुसन्धान शुरू गरिएको जानकारी दिए। <em>(रासस-एएफपी)</em></p>
प्रतिक्रिया दिनुहोस्
.jpg)
