फोन नउठाएको झोकमा प्रेमिकाको हत्या!
<p>विराटनगर। दुई दिनअघि विराटनगर–१२, मलहनुवा रोड नजिकै उखुबारीमा एक युवतीको शव फेला पर्‍यो।</p>
<p>पहिले पहिचान हुन नसकेको त्यो शव सुनसरी दुहवी–६ की सम्झना परियार खत्रीको भएको खुल्यो।</p>
<p>प्रहरीले सम्झनाको हत्यामा संलग्न एकजनालाई पक्राउ गरेको छ। पक्राउ पर्नेमा क्‍वालिटी नुडल्स उद्योगमा कार्यरत सप्तरीको कृष्णश्रवण गाउँपालिका–३ का सुरेन्द्रप्रसाद साह रहेका छन्।</p>
<p>मोरङ प्रहरीले आज पत्रकार सम्मेलन गर्दै घटनाका आरोपी साहलाई सार्वजनिक गरेको हो।</p>
<p>जिल्ला प्रहरी कार्यालयका प्रमुख, प्रहरी उपरीक्षक विश्व अधिकारीले प्रेम सम्बन्धका कारण सम्झनाको हत्या भएको प्रारम्भिक अनुसन्धानले देखाएको बताए।</p>
<p>उनका अनुसार साह र सम्झनाबीच तीन वर्षदेखि प्रेम सम्बन्ध रहेको खुलेको छ।</p>
<p>हत्या भएको दिन २१ माघमा सम्झनालाई साहले फोन गरेको र सम्पर्कमा नआएपछि खोज्न उनको घर दुहवीसम्म पुगेको प्रहरीले बताएको छ।</p>
<p>घरमा पनि सम्झनालाई नभेटेपछि साहले खोज्ने क्रममा बाँसबारी चोकमा फेला पारेका थिए। बाँसबारी चोकमा फेला पारेपछि मोटरसाइकलमा राखेर पश्चिम नहरको बाटो हुँदै दक्षिण मलहनुवा रिङरोडमा पुर्‍याएको र रिङ्ग रोड नजिकै उखुबारीमा पुर्‍याएर हत्या गरेको प्रहरीले जनाएको छ।</p>
<p>त्यहाँ पुगेर भनाभन भएपछि मृतककै सलले घाँटीमा बेरेर धारिलो बाँसलाई हतियारको रुपमा प्रयोग गरी हत्या गरेको साहले स्वीकार गरेको प्रहरी उपरीक्षक अधिकारीले बताए।</p>
प्रतिक्रिया दिनुहोस्
.jpg)
