एनभीए अवार्डः सरस्वती र कूलबहादुर उत्कृष्ट
<p>काठमाडाैं। सशस्त्र प्रहरी बल (एपीएफ) क्लबकी सरस्वती चौधरी र नेपाल पुलिस क्लबका कूलबहादुर थापा नेपाल भलिबल संघले प्रदान गर्ने एनभीए अवार्डमा वर्षकै उत्कृष्ट खेलाडी घोषित भएका छन्।</p>
<p>एनभीए अवार्डको तेस्रो संस्करणमा सरस्वती महिलातर्फ उत्कृष्ट बनिन् भने कूलबहादुर पुरुषतर्फ उत्कृष्ट घोषित भएका हुन्।</p>
<p>नेपाल पुलिस क्लबकी उषा भण्डारी महिलातर्फ उदीयमान खेलाडी घोषित भएकी छिन्। पुरुषतर्फ भने त्रिभुवन आर्मी क्लबका सरणसामरी क्षेत्री उदीयमान खेलाडी घोषित भए। उत्कृष्ट सबैले जनही २५ हजार रूपैयाँ पुरस्कार जिते।</p>
<p>एपीएफ क्लब महिलातर्फ तथा नेपाल पुलिस क्लब पुरुषतर्फ २०७५ वर्षको उत्कृष्ट भलिबल टीम घोषित भए। उत्कृष्ट घोषित दुवै टीमले समान एक लाख रूपैयाँ पुरस्कार पाए।</p>
<p>नेपाल भलिबल संघद्वारा सम्बन्धनप्राप्त प्रतियोगिताहरूमा एपीएफ महिला टीमले १० मध्ये ९ प्रतियोगिताको उपाधि जितेको थियो। पुरुषतर्फ पुलिस क्बलले ९ मध्ये ६ प्रतियोगितामा विजय हासिल गरेको थियो।</p>
<p>एपीएफ महिला टीमका प्रशिक्षक ज्ञानेन्द्र बिष्ट र पुलिस पुरुष टीमका सरोज श्रेष्ठ उत्कृष्ट प्रशिक्षक घोषित भए। दुवैले जनही २५ हजार रूपैयाँ नगद पुरस्कार पाए।</p>
<p><strong>कामको कदर</strong></p>
<p>भलिबल खेलको विकास र विस्तारमा अनवरत योगदान पुर्‍याएका न्यू डायमण्ड एकेडेमीका संस्थापक एवं प्रशिक्षक तथा नेपाल भलिबल संघ विद्यालय कमिसनका उपाध्यक्ष कुमार राई पनि सम्मानित भएका छन्।</p>
<p>राईलाई संघले २५ हजार रूपैयाँसहित अभिनन्दन पत्रले सम्मान गरेको हो। त्यस्तै संघले नेदरल्याण्ड भलिबल संघका विकास निर्देशक पिटर भान तरेललाई पनि सम्मान पत्र र दोसल्ला ओढाएर सम्मान गरेको छ।</p>
<p>बंगलादेशको ढाकामा सम्पन्न प्रथम एभीसी एशियन सेन्ट्रल जोन सिनियर महिला भलिबल च्याम्पियनसिप २०१९ को उपाधि जितेको महिला भलिबल टीमका प्रत्येक सदस्यलाई २५ हजार रूपैयाँसहित सम्मान गरिएको छ।</p>
<p><strong>कोपिलाको सन्यास</strong></p>
<p>भलिबल खेलमा लामो समय बिताएकी कोपिला उप्रेतीले अन्तर्राष्ट्रिय खेलाडी जीवनबाट सन्यास लिएकी छन्। कोपिलालाई संघले ५० हजार रूपैयाँसहित सम्मान पत्रले सम्मान गरेको हो।</p>
<p>कोपिलाले २०६१ सालदेखि नेपाल पुलिस क्लब र राष्ट्रिय टोलीबाट निरन्तर भलिबल खेल्दै आएकी थिइन्।</p>
प्रतिक्रिया दिनुहोस्
.jpg)
