चारुमती विहारमा अन्तर्राष्ट्रिय त्रिपिटक वाचन
<p>काठमाडाैं। नेपाल भ्रमण वर्षलाई राष्ट्रिय तथा अन्तर्राष्ट्रिय तहमा प्रवर्द्धन गर्न चावहिलस्थित चारुमती विहारमा आज अन्तर्राष्ट्रिय त्रिपिटक वाचन गरिएको छ।</p>
<p>स्वदेशी तथा विदेशी भिक्षुले बौद्ध साहित्यका केही वाक्यांशलाई सामूहिकरूपमा पाली भाषामा पाठ गरी विश्व शान्ति तथा राष्ट्रिय कल्याणका लागि कामना गरिएको हो।</p>
<p>चारुमती बुद्धिष्ट मिसन नेपाल र थाइ इण्डो चाइना फ्रेण्डसीप एशोसियसनको संयुक्त आयोजनामा कार्यक्रम भएकाे साे विहार करीब दुई हजार ३०० वर्ष पुरानो मानिन्छ।</p>
<p>नेपालबाट थेरवाद, महायान र बज्रयान सम्प्रदायका करीब १५० बौद्ध गुरु तथा भारत, श्रीलङ्का, थाइल्याण्ड, म्यान्मा, कम्बोडिया र लाओसका ७० बौद्ध गुरुको सहभागिता थियो। बौद्धधर्मको पुरानो ग्रन्थ त्रिपिटक तीन भागमा छन्। त्रिपिटक पाली भाषामा लेखिएको महत्त्वपूर्ण ग्रन्थ हो। यो अन्य भाषामा अनुवाद गरिएको छ।</p>
<p>शाक्यमुनि बुद्धले बोधिसत्व प्राप्त गरेपछि जीवनको अन्तिम समयसम्म दिएका प्रवचन तथा उपदेशलाई बौद्ध शिक्षाका रूपमा सङ्कलन गरिएकाले यसलाई पवित्र कृतिका रूपमा लिइएको छ। उक्त कार्यक्रमका प्रचारप्रसारका लागि साइकलयात्रा र पदयात्रा आज बिहानै गरिएको थियो। </p>
<p>यस्तै २६ माघमा सांस्कृतिक तथा प्रवज्या कार्यक्रम राखिएको छ। <em>रासस</em></p>
प्रतिक्रिया दिनुहोस्
.jpg)
