लाटाेकाेसेराे संरक्षणका लागि उत्सव
<p>स्याङ्जा। लाटोकोसेरोको संरक्षणमा जनचेतना जगाउने उद्देश्यले आजदेखि स्याङजाको बिरुवा गाउँपालिका–३ र पुतलीबजार नगरपालिका–२ को सिमाना राङभाङ-भैँसेगौडामा ‘नेपाल लाटोकोसेरो तथा हुचील उत्सव २०७६’ शुरू भएको छ।</p>
<p>राङभाङ युवा क्लब, मिलेनियम ट्रेक व्यवस्थापन समिति र प्रकृतिका साथीहरू संस्थाद्वारा आयोजित उत्सवको गण्डकी प्रदेशका आर्थिक मामिला तथा योजना मन्त्री किरण गुरुङले उद्घाटन गरे। प्रकृति र संस्कृतिमा नेपाल सम्पन्न भएकाले पर्यावरणीय संरक्षणमा योगदान गर्दै आएका लाटोकोसेरोलगायतको संरक्षण गर्नु सबैको दायित्व भएको उनले बताए। </p>
<p>उत्सवका अवसरमा लाटोकोसेरासम्बन्धी सङ्ग्रहालय प्रदर्शनी, स्थानीय झोरा नृत्य, लाटोकोसेरो संरक्षणसम्बन्धी नाँच, विद्यालयस्तरीय लाटोकोसेरो चित्रकला, कथा, निबन्ध तथा कविता प्रतियोगिताका उत्कृष्ट रचना प्रदर्शनी गरिएको छ।</p>
<p>लाटोकोसेरोको जानकारी भएको सूचना, चित्र, तथा फोटोको प्रदर्शनी, लाटोकोसेरोको रोबोट एवं नमूना प्रदर्शनीका आकर्षण बनेका छन्। उत्सव भाेलिसम्म चल्नेछ। <em>रासस</em></p>
प्रतिक्रिया दिनुहोस्
.jpg)
