.jpg)
‘मेमोरी कार्ड’मा भएकाे विवादले महिलाको हत्या, एकै परिवारका चारजना पक्राउ
<p>धनुषा। धनुषाको औरही गाउँपालिका–२ मा एक महिलाको हत्या भएको छ।</p>
<p>धनुषा प्रहरीले आज पत्रकार सम्मेलन गर्दै हत्या आरोपी एकै परिवारका चारजनालाई सार्वजनिक गरेको हो।</p>
<p>औरही गाउँपालिका–२ की २२ वर्षीया चिन्तामणि पासमानको हत्यामा संलग्न रहेको भन्दै प्रहरीले उनकी सासू कमला (४५), ससुरा राधाकृष्ण (५५), नन्द पुनिता (२०) र श्रीमान अनिलकुमार (३०)लाई पक्राउ गरेको छ।</p>
<p>चिन्तामणि र नन्द पुनिताबीच मोबाइलको मेमोरीकार्डका विषयमा विवाद हुँदा हत्या भएको धनुषा प्रहरी प्रमुख प्रहरी उपरीक्षक रमेशकुमार बस्नेतले बताए।</p>
<p>बस्नेतका अनुसार मोबाइलको ‘मेमोरी कार्ड’का विषयमा १८ माघमा वादविवादका क्रममा चिन्तामणिको घाँटी थिचेर हत्या भएको देखिएको छ।</p>
<p>हत्या लुकाउन परिवारले चिन्तामणि झुण्डिएको भनेर हल्ला फैलाएको प्रहरीको भनाइ छ। उपचारका लागि प्रादेशिक अस्पताल जनकपुर ल्याएर चारैजना फरार भएका थिए।</p>
<p>सासू र नन्दलाई १९ माघमा जनकपुरधाम उपमहानगरपालिकिा–४, पेठिया बजारबाट प्रहरीले पक्राउ गरेको थियो। त्यस्तै श्रीमान र ससूरालाई आज बिहान जनकनन्दनी गाउँपालिका–२, बलाहा टोलबाट पक्राउ गरेको प्रहरीको भनाइ छ।</p>
<p>उनीहरूलाई म्याद थप गरी थप अनुसन्धान थालिएको प्रहरी उपरीक्षक बस्नेतले जानकारी दिए।</p>
<p> </p>
प्रतिक्रिया दिनुहोस्
.jpg)
