पत्रकारले पारिश्रमिक नपाएकाेमा महासंघकाे ध्यानाकर्षण
<p>काठमाडौं। नेपाल रिपब्लिक मिडिया प्रालि र टीबीआई पब्लिकेसन्स प्रालिअन्तर्गतका सञ्चारमाध्यममा कार्यरत पत्रकारले पारिश्रमिक नपाएकोमा नेपाल पत्रकार महासंघले गम्भीर ध्यानाकर्षण भएको जनाएको छ।</p>
<p>यी दुवै सञ्चारमाध्यममा कार्यरत पत्रकारहरूले लामाे समयदेखि पारिश्रमिक नपाएकाे सार्वजनिक भएपछि महासंघले विज्ञप्ति निकालेर ध्यानाकर्षण भएकाे जनाएकाे हाे।</p>
<p>महासंघले श्रमजीवी पत्रकारले लामो समयमदेखि पारिश्रमिक एवं सुविधा नपाउनु दुःखद् विषय भएको टिप्पणी गरेको छ।</p>
<p>साथै महासंघले श्रमजीवी पत्रकारले आफ्ना हक, अधिकारका लागि सञ्चालन गरेको दबाबमूलक आन्दोलनप्रति पूर्ण समर्थन र ऐक्यवद्धता जनाएको छ।</p>
<p>विज्ञप्तिमा भनिएको छ– ‘श्रमजीवी पत्रकारको श्रमको मूल्यमा कुनै प्रकारको खेलबाड स्वीकार्य हुनसक्दैन।’</p>
<p>नेपाल रिपब्लिक मिडियाअन्तर्गतका नागरिक र रिपब्लिका दैनिकमा कार्यरत पत्रकारले तीन महीनादेखि र स्ट्रिन्जरहरूले १० महीनादेखि पारिश्रमिक नपाएकाे जनाएका छन्।</p>
<p>यस्तै टीबीआई पब्लिकेसन्स प्रालिद्वारा प्रकाशित कारोबार दैनिकमा कार्यरत पत्रकारले श्रमजीवी पत्रकार ऐनअनुरुप पाउनुपर्ने सेवा सुविधा लामो समयदेखि प्राप्त गरेका छैनन्। सो विषयमा पनि महासंघले ध्यानाकर्षण जनाएको छ।</p>
<p>नेपाल रिपब्लिक मिडिया प्रालि र टीबीआई पब्लिकेसन्स प्रालिले एक साताभित्रै श्रमजीवी पत्रकारका माग र गुनासा सुनुवाइ गरी सम्बोधन गर्न महासंघले आग्रह गरेको छ। सो आग्रहलाई बेवास्ता गरी समस्या समाधानमा उदासिनता देखाएमा कडा कदम चाल्ने महासंघले चेतावनीसमेत दिएको छ।</p>
प्रतिक्रिया दिनुहोस्
.jpg)
