बलात्कारका फरार अभियुक्त कुवेत जाँदै गर्दा विमानस्थलबाट समातिए
<p>काठमाडाैं। आठ महीनाअघि धादिङमा १६ वर्षीया बालिकालाई जबर्जस्ती करणी गरेर फरार रहेका एक व्यक्ति वैदेशिक रोजगारीमा जाने क्रममा आज पक्राउ परेका छन्।</p>
<p>प्रहरीको केन्द्रीय अनुसन्धान ब्यूरोले आज दिउँसो कुवेत जान लागेका धादिङ गजुरी गाउँपालिका-८, बस्नेतगाउँका २८ वर्षीय हरिकृष्ण भन्ने हेमनसिंह बस्नेतलाई विमानस्थलबाटै पक्राउ गरेको हो।</p>
<p>बाटो खन्ने काममा स्काभेटर चालक रहेका बस्नेतले १४ जेठ २०७६ मा स्थानीय १६ वर्षीया बालिका आफ्नै घरमा सुतिरहेको समयमा राति ढोका फोडेर जबर्जस्ती करणी गरेकाे प्रहरीकाे भनाइ छ।</p>
<p>जबर्जस्ती करणी गरेलगत्तै उनी फरार थिए। उनी लामो समय भारतका विभिन्न स्थानमा लुकेर बसेका थिए।</p>
<p>केही समयअघि मात्रै उनी वैदेशिक रोजगारीमा जाने भन्दै नेपाल आएका थिए। सीआईबीले उनलाई पक्राउ गरी कानूनी कारबाहीका लागि आजै जिल्ला प्रहरी कार्यालय धादिङ पठाएको छ।</p>
प्रतिक्रिया दिनुहोस्
.jpg)
