तिब्बतीलाई अमेरिका लैजान अनुमतिपत्र बनाइदिन अमेरिकी दूतावासको दबाब
<p>काठमाडौं। नेपालस्थित अमेरिकी दूतावासले काठमाडौंमा रहेका केही तिब्बती शरणार्थीलाई यात्रा अनुमतिपत्र (ट्राभल डकुमेन्ट) बनाइदिन परराष्ट्र र गृह मन्त्रालयलाई दबाब दिएको छ।</p>
<p>दूतावासले परराष्ट्र हुँदै गृह मन्त्रालयलाई पत्र पठाएर र गृहका अधिकारीलाई पटक–पटक भेटेरै छजना शरणार्थीलाई अमेरिका लैजानका लागि कागजात बनाइदिन दबाब दिएको हो।</p>
<p>दूतावासले गत अगस्टको शुरूमै १९ वर्षीया छोतेन छोजोमसहितका नाममा अनुमतिपत्र जारी गरिदिन पत्र पठाएको थियो।</p>
<p>गृह मन्त्रालयस्थित उच्च स्रोतका अनुसार दूतावासको पत्रमा नाम उल्लेख गरिएकाको राष्ट्रियता ‘तिब्बतीयन’ उल्लेख छ।</p>
<p>उक्त कागजातलाई ‘तिब्बती रेफ्युजी वेलफेयर अफिस’ का संयोजक छुल्त्रिम ग्यात्सो र सचिव कर्मा ग्याल्जेनले प्रमाणित गरेका छन्। यो संस्थालाई नेपालले वैधानिकता दिएको छैन।</p>
<p>ती छजना शरणार्थीका परिवार तथा आफन्त अमेरिकामा रहेकाले ‘परिवारसँग भेट्टाउनका लागि कानूनी अड्चन फुकाइदिन’ दूतावासले आग्रह गरेको थियो।</p>
<p>सरकारी अधिकारीहरूले भने तिब्बती शरणार्थीका परिवार अमेरिकाकै आवासीय नागरिक भए उनीहरूका नाममा राहदानी जारी गरेर लैजान विकल्प सुझाएका छन्।</p>
<p>गृहले दूतावासको मागअनुसार तिब्बती शरणार्थीका नाममा अनुमतिपत्र दिन इन्कार गरेको छ।</p>
<p>गृहले नमानेपछि अमेरिकी दूतावासका कन्सुलर माइकल ई. म्युसीले गृहका अधिकारीसँग भेटेर यात्रा अनुमतिपत्र जारी गरिदिन दबाब दिएको आजको कान्तिपुर दैनिकमा समाचार छ।</p>
<p> </p>
प्रतिक्रिया दिनुहोस्
.jpg)
