टाेखामा भूकम्पले भत्काएका ६७७ घर पुनर्निर्माण
<p>काठमाडाैं। काठमाडौं उत्तरी क्षेत्र रहेको टोखा नगरपालिकामा ६७७ घर पुनर्निर्माण भएको छ। १२ वैशाख २०७२ को विनाशकारी भूकम्पले भत्काएका एक हजार ७४९ घरमध्ये ६७७ घर पुनर्निर्माण भएको हो।</p>
<p>नगरपालिकाका पुनर्निर्माण शाखा प्रमुख प्रतीक्षा त्रिपाठीले भूकम्पले क्षति पुर्‍याएका एक हजार ७४९ घरमध्ये एक हजार ५४७ घरले पहिलो किस्ता, ७५२ घरले दोस्रो किस्ता र ६७७ घरले निर्माण सम्पन्न गरिसकेको जानकारी दिइन्।</p>
<p>नगरपालिकाले सरकारले तोकेको रकमअनुुसार पहिलो किस्ताबापत ५० हजार, दोस्रो किस्ताबापत एक लाख ५० हजार र घर पुनर्निर्माण भएपछि तेस्रो किस्ताबापत एक लाख रूपैयाँ प्रदान गर्दै आएको छ। नगरपालिकाका प्रमुख प्रकाश अधिकारीले भूकम्पपीडितले नगरपालिकामा दिएको निवेदनका आधारमा अध्ययन गरी रकम उपलब्ध गराउँदै आएको जानकारी दिए।</p>
<p>यस्तै नगरपालिकाले सरकारले दिने रकमबाहेक पैसाकै अभावले घर बनाउन नसक्ने नगरवासीलाई बैंकबाट सहुलियत ब्याजदरमा रकम उपलब्ध गराउन सहयोग गर्नेसमेत गरेको छ। २०७२ को भूकम्पले टोखा नगरपालिकाभित्रको झोर र टोखा बजारमा ठूलो क्षति पुर्‍याएको थियो। नगरपालिकाले पूर्ण क्षति नभएका घरलाई ‘रेट्रोफिटिङ’का लागिसमेत रकम उपलब्ध गराउँदै आएको छ।</p>
<p>नगरपालिकामा ‘रेट्रोफिटिङ’का लागि ५३ निवेदन आए पनि अध्ययन र अनुसन्धानका आधारमा पाँचजनालाई रकम उपलब्ध गराएको छ। नगरपालिकाले रेट्रोफिटिङका लागि भने एक लाख रूपैयाँ उपलब्ध गराउँछ।</p>
<p>भूकम्पबाट क्षति पुगेको घर पुनर्निर्माणका लागि आवश्यकपर्ने काठ भने जिल्ला वन कार्यालयबाट समन्वय गरेर उपलब्ध भइरहेको नगरपालिकाले जनाएको छ। </p>
प्रतिक्रिया दिनुहोस्
.jpg)
