घुस लिएको आरोपमा विशेष अदालतमा अभियोग पत्र दायर
<p>काठमाडौं। अख्तियार दुरुपयोग अनुसन्धान आयोगले सेवाग्राहीसँग घुस लिएको आरोपमा भूमिसुधार तथा मालपोत कार्यालय नवलपरासी (बर्दघाट-सुस्ता पश्चिम) का खरिदार नेत्रबहादुर चौधरीविरुद्ध आज विशेष अदालतमा मुद्दा दायर गरेको छ ।</p>
<p>मोही जग्गा बाँडफाँट गरिदिने प्रयोजनका लागि विभिन्न बहाना बनाई निजले सेवाग्राहीसँग ४० हजार रूपैयाँ घुस लिएको आयोगले आरोप लगाएको छ।</p>
<p>सेवाग्राहीसँग पटकपटक घुस मागिरहेको भन्ने सूचनाका आधारमा आयोगको बुटवलस्थित कार्यालयबाट खटिएको टोलीले निजलाई घुस लिइसकेको अवस्थामा नियन्त्रणमा लिएको थियो।</p>
<p>यस्तै आयोगले मोटरसाइकल चालकसँग दुई हजार घुस लिएको अवस्थामा पक्राउ परेका महानगरीय ट्राफिक प्रहरी प्रभाग कोटेश्वरमा कार्यरत प्रहरी जवान लोगबहादुर खड्काविरुद्ध पनि आजै विशेष अदालतमा मुद्दा दायर गरेको छ।</p>
<p>खड्काले ड्युटीमा खटिएका बेला ‘कुनै पनि गल्ती नगरेको अवस्थामा सेवाग्राहीसँग सवारी चालक अनुमतिपत्र मागी कुनै चिट नदिई मिलाउनुस्’ भनी घुस लिएको आयोगले आरोप लगाएको छ। <em>रासस</em></p>
प्रतिक्रिया दिनुहोस्
.jpg)
