गोली लागेर पनि प्रहरी जवान गंगाले चन्द समूहका दुईजना कार्यकर्ता पक्रिए
<p>बर्दिया। बर्दियाको मधुवन नगरपालिका–४, मौवामा प्रतिबन्धित नेत्रविक्रम चन्द नेतृत्वको नेकपा समूहका कार्यकर्ता गोप्य छलफल गरिरहेका थिए।</p>
<p>एनसेल टावरमा विष्फोट र आगजनी गरेपछि प्रहरीले चन्द समूहका कार्यकर्ताको खोजी गरिरहेको थियो।</p>
<p>मौवामा पनि गोप्यरूपमा छलफल गरिरहेको भन्ने सूचना पाएपछि इलाका प्रहरी कार्यालय ढोढरीको प्रहरी टोली त्यहाँ पुग्यो।</p>
<p>चारजना कार्यकर्ताले छलफल गरिरहेका बेला प्रहरी टोलीले घर घेरा हाल्यो। त्यसक्रममा दुईजना भाग्न सफल भए।</p>
<p>तर, दुईजनालाई भने प्रहरीले समात्यो। त्यस क्रममा प्रहरी जवान गंगा चौधरी गोली लागेर घाइते भए।</p>
<p>एकजना व्यक्तिलाई समातिरहेकै समयमा अर्को हातमा उनले पेस्तोल समातेका थिए। दुईजनाबीच घम्साघम्सी भएपछि अचानक उनको पेस्तोल पड्कियो। र, आफ्नै तीघ्रामा गोली लाग्यो।</p>
<p>गोली लागे पनि उनले आफूले समातेका व्यक्ति छाडेनन्।</p>
<p>जिल्ला प्रहरी कार्यालय बर्दियाका प्रमुख, एसपी राजेशनाथ बाँस्तोलाले चन्द समूहका कार्यकर्ता पक्राउ परेको अवस्थामा घम्साघम्सी हुँदा पेस्तोल पड्किएको बताए।</p>
<p>“गोली कतैबाट चलेको होइन। एक अर्कामा घम्साघम्सी हुने क्रममा पड्किन गयो”, उनले देखापढीसँग भने, “सोही क्रममा प्रहरी जवानको तीघ्रामा गोली लाग्यो।”</p>
<p>एसपी बाँस्तोलाले चारजनाको समूहमा रहेका मध्ये २ जनालाई पक्राउ गरिएको बताए। उनका अनुसार पक्राउ पर्नेमा चन्द समूहका रोहित सुनार र जयबहादुर ठाडामगर रहेका छन्।</p>
<p>उनीहरुलाई जिल्ला प्रहरी कार्यालय बर्दियाको हिरासतमा राखिएको छ।</p>
<p>घाइते भएका प्रहरी जवानलाई थप उपचारका लागि भेरी अञ्चल अस्पताल नेपालगन्जमा भर्ना गरिएको छ। उनको उपचार भइरहेको र अवस्था सामान्य रहेको प्रहरीले जनाएको छ।</p>
<p>प्रहरीले चन्द समूहका कार्यकर्ताको साथबाट एकथान पेस्तोल, पार्टीका विभिन्न दस्ताबेज र आवश्यक कागजातसमेत बरामद गरेको जनाएको छ।</p>
<p> </p>
प्रतिक्रिया दिनुहोस्
.jpg)
