११ दिनपछि भेटिए लाङटाङमा हराएका दुई विद्यार्थी
<p>काठमाडौं। ३ माघदेखि लाङटाङ राष्ट्रिय निकुञ्जमा हराइरहेका दुई विद्यार्थीको शव भेटिएको छ।</p>
<p>सिन्धुपाल्चोक हेलम्बुका १७ वर्षीय वाङगेल शेर्पा र काठमाडौं गोकर्णेश्वरका १९ वर्षीय जापान लामाको शव दुप्चेश्वर–१, फेदी नजिक आज दिउँसो फेला परेको नुवाकोट प्रहरीले जनाएको छ।</p>
<p>शव भेटिए पनि खराब मौसमका कारण निकाल्न नसकिएको जिल्ला प्रहरी कार्यालय नुवाकोटका डीएसपी राजेश थापाले जानकारी दिए। “अब भोलि नै शव निकालिनेछ”, थापाले भने।</p>
<p>उनीहरूको खोजी कार्यका लागि उद्धारकर्ताहरू परिचालन गरिएको थियो। उद्धारकर्ताहरूले हिउँले पुरिएको अवस्थामा शव फेला पारेको नुवाकोट प्रहरी प्रमुख, प्रहरी उपरीक्षक अविनारायण काफ्लेले जानकारी दिए।</p>
<p>दुवै विद्यार्थी काठमाडौंको बौद्धस्थित कुमारी बोर्डिङ स्कुलमा अध्ययनरत थिए।</p>
<p>गोसाइँकुण्ड घुमेर उनीहरू हेलम्बु फर्कंदै गर्दा बेपत्ता भएका थिए। २९ पुसमा हेलम्बु पुगेका उनीहरू १ माघमा गोसाइँकुण्ड पुगेर घ्याङफेदीस्थित फेदी लजमा बास बसेका थिए।</p>
<p>३ माघमा बिहान ९ बजे उनीहरू घोप्टेफेदीबाट दक्षिणमा पर्ने तालु गाउँतिर हिँडेका थिए। प्रहरीका अनुसार त्यसपछि उनीहरू सम्पर्कविहीन भएका थिए।</p>
<p> </p>
प्रतिक्रिया दिनुहोस्
.jpg)
