पुछारको सरस्वतीविरुद्ध मनाङको संघर्षपूर्ण जित
<p>काठमाडौं। विमला रानाको गोलमा साविक विजेता मनाङ मर्स्याङ्दी क्लबले आज पुछारको सरस्वती युथ क्लबलाई १–० ले हराएको छ। </p>
<p>रेलिगेशन क्षेत्रबाट माथि उक्लन संघर्ष गरिरहेको सरस्वती युथमाथि संघर्षपूर्ण नतिजा निकालेको मनाङले जितसँगै १६ अंक जोडेको छ। जुन शीर्ष स्थानको त्रिभुवन आर्मीसँग बराबरी हो। </p>
<p>तथापी गोलअन्तरको आधारमा मनाङ तेस्रो स्थानमा कायमै छ। त्रिभुवन आर्मी शीर्ष स्थानमा छ भने मछिन्द्र दोस्रो स्थानमा छ। </p>
<p>दोस्रो हाफको शरूमै विमलले गरेको गोल मनाङलाई तीन अंक दिलाउन पर्याप्त भयो। अञ्जन विष्टले हानेको गोल क्रसबार लागेर फर्किएको थियो। उक्त रिबाउन्ड बललाई विमलले कुनै गल्ति नगरी पोष्टको दिशा दिए।</p>
<p>लिगमा विमलको यो चौथो गोल हो। जुन लिगमा विमलभन्दा धेरै गोल गर्नेमा सशत्र प्रहरी बलको एपीएफ क्लबका आशिष लामा र च्यासल युथका सन्तोष साहुखल छन्। आशिष र सन्तोषले समान पाँच गोल गरेका छन्। </p>
<p>यो जितसँगै मनाङको अपराजित यात्रा कायमै छ। लिगमा अपराजित रहने मनाङ एक्लो टीम हो। सरस्वतीले भने अहिलेसम्म जित निकाल्न सकेको छैन। लिगको पुछारमा रहेको सरस्वतीको एक अंक मात्र छ।</p>
प्रतिक्रिया दिनुहोस्
.jpg)
