एन्फा र इंग्ल्याण्ड फुटबल एशोसिएसनबीच सम्झौता
<p>काठमाडौं। अखिल नेपाल फुटबल संघ (एन्फा) र इंग्ल्याण्ड फुटबल एशोसिएसनबीच मैत्रीपूर्ण खेलका लागि सम्झौता भएको छ।</p>
<p>नेपाल र बेलायतको दौत्य सम्बन्ध २०४ वर्ष पुगेको उपलक्ष्यमा मैत्रीपूर्ण खेलमा सहभागिता जनाउने र आयोजना गर्ने सम्झौतापत्रमा हस्ताक्षर भएको हो। </p>
<p>सम्झौतापत्रमा एन्फा अध्यक्ष कर्माछिरिङ शेर्पा र इंग्ल्यान्ड फुटबलका लोरेन जोन्सले हस्ताक्षर गरेका छन्। </p>
<p>एन्फा अध्यक्ष शेर्पाले नेपाल र बेलायतको सम्बन्ध २०४ वर्ष पुगेको अवसरमा पहिलो मैत्रीपूर्ण खेल बेलायत र दोस्रो मैत्रीपूर्ण खेल नेपालमा आयोजना हुने बताए।</p>
<p>एन्फाका वरिष्ठ उपाध्यक्ष पंकजविक्रम नेम्वाङले मैत्रीपूर्ण खेलहरू आगामी मे महीनामा हुने बताए। सन् २०२१ मा पनि मैत्रीपूर्ण खेलले निरन्तरता पाउने उनले बताए। </p>
<p>वार्षिक रूपमा मैत्रीपूर्ण खेलको निरन्तरता दिने प्रयास अन्फाबाट हुने र सोही अनुसार काम अगाडी बढाउने उनले बताए।</p>
<p>२५ मे मा हुने पहिलो मैत्रीपूर्ण खेल सात हजार दर्शक क्षमता रहेको अल्डरसट एफसीको मैदानमा हुनेछ। </p>
<p>यस्तै सन् २०२१ को मे मा इंग्ल्यान्डको टीम नेपाल आउने छन्। नेपालमा हुने खेलको मिति भने तय भएको छैन। </p>
प्रतिक्रिया दिनुहोस्
.jpg)
